पुणे : गेल्या काही दिवसांपासून केतन अग्रवाल हत्या प्रकरणात नवनवीन धक्कादायक खुलासे समोर येत असताना आता या प्रकरणाला एक वेगळे वळण मिळाले आहे. या गुन्ह्याचा तपास करण्यासाठी पुणे पोलीस शर्थीचे प्रयत्न करत आहेत. मात्र, अद्याप पोलिसांच्या हाती कोणताही ठोस पुरावा किंवा प्रत्यक्षदर्शी साक्षीदार लागलेला नाही. केतनला दरीत नेमके कोणी ढकलले, हे सिद्ध करणे पोलिसांसाठी मोठे आव्हान बनले आहे.या पार्श्वभूमीवर, तपास अधिकाऱ्यांनी आता न्यायालयाचे दरवाजे ठोठावले आहेत.
आतापर्यंत केवळ आरोपींनी दिलेल्या जबाबाच्या आधारे हा तपास सुरू आहे.मात्र पोलिसांनी आता न्यायालयात अर्ज करून, केतनची होणारी पत्नी सिया गोयल हिची ‘लाय डिटेक्टर’ (पॉलिग्राफ) चाचणी करण्याची परवानगी मागितली आहे.तपासाला गती देण्यासाठी आणि नवीन धागेदोरे शोधण्यासाठी ही चाचणी अत्यंत आवश्यक असल्याचा युक्तिवाद पोलिसांनी न्यायालयात केला आहे.
दुसरीकडे सियाचे वकील विपुल यांनी असे म्हटले आहे कि,तपास यंत्रणेने परवानगीसाठी न्यायालयाकडे धाव घेतली असली तरी, अशी चाचणी करण्यापूर्वी अनेक कायदेशीर आणि तांत्रिक प्रक्रिया पूर्ण करणे आवश्यक आहे. यासोबतच’लाय-डिटेक्टर’ चाचणी करण्यासाठी आरोपीची संमती अनिवार्य असते, असंही त्यांनी पुढे नमूद केलं.
त्यामुळे, आता पोलिसांना या चाचणीसाठी परवानगी मिळणार का आणि या संशयास्पद मृत्यू प्रकरणातून कोणता नवा खुलासा समोर येतो, याकडे सर्वांचे लक्ष लागले आहे.
