पुणे : पुणे विभागातील पदवीधर आणि शिक्षक मतदारसंघाच्या निवडणुकीचा निकाल जाहीर होण्यास विलंब होत आहे. मंगळवारी सकाळी 8 वाजता मतमोजणी सुरू झाली. मात्र, उमेदवारांची मोठी संख्या आणि मतपत्रिकांची छाननी यामुळे रात्री उशिरापर्यंत मोजणीची प्रक्रिया सुरू होती. त्यामुळे अंतिम निकाल बुधवारी दुपारपर्यंत जाहीर होण्याची शक्यता व्यक्त केली जात आहे.
पदवीधर मतदारसंघात महाविकास आघाडीच्या राष्ट्रवादी काँग्रेस शरदचंद्र पवार पक्षाच्या उमेदवार हर्षदा देशमुख यांना पहिल्या पसंतीची 1,11,204 मते मिळाली. भाजपच्या स्मिता जाधव यांना 1,02,335 मते मिळाली. त्यामुळे जाधव 8,869 मतांनी मागे आहेत. या मतदारसंघात विजयासाठी 1,13,095 मतांचा कोटा निश्चित करण्यात आला. कोणत्याही उमेदवाराला हा आकडा गाठता आला नसल्याने आता दुसऱ्या पसंतीच्या मतांची मोजणी सुरू झाली आहे.
पुणे, सातारा, सांगली, कोल्हापूर आणि सोलापूर या 5 जिल्ह्यांचा या निवडणुकीत समावेश होता. पदवीधर मतदारसंघात 2,43,611 मतदारांनी मतदान केले, तर शिक्षक मतदारसंघात 53,185 जणांनी मतदानाचा हक्क बजावला. पदवीधर मतदारसंघात 47, तर शिक्षक मतदारसंघात 30 उमेदवार निवडणुकीच्या रिंगणात होते.
शिक्षक मतदारसंघातील छाननी सायंकाळी 6.30 वाजता पूर्ण झाली. यामध्ये 51,511 मते वैध, तर 1,673 मते अवैध ठरली. त्यानुसार विजयासाठी 25,756 मतांचा कोटा ठरवण्यात आला. दुसरीकडे, पदवीधर मतदारसंघात सुमारे 2.26 लाख मते वैध ठरली. या मतमोजणीसाठी 100 टेबल, तर शिक्षक मतदारसंघासाठी 42 टेबल ठेवण्यात आले होते.
या निवडणुकीत पसंतीक्रमानुसार मतमोजणी केली जात आहे. त्यामुळे अंतिम निकालासाठी आणखी वेळ लागण्याची शक्यता आहे. दरम्यान, निकाल कोणाच्या बाजूने लागणार याकडे सर्वांचे लक्ष लागले आहे.
