पुणे: प्रवासादरम्यान ज्येष्ठ नागरिकांना गुंगीच्या गोळ्या देऊन त्यांच्याकडील मौल्यवान वस्तू चोरणाऱ्या 63 वर्षीय सराईत आरोपीला पुण्यातील स्वारगेट पोलिसांनी मध्य प्रदेशातील उज्जैन येथून अटक केली आहे. बाबू भुरेखान असे या आरोपीचे नाव असून, त्याच्याकडून सुमारे 1 लाख 40 हजार रुपये किमतीची सोन्याची लगड जप्त करण्यात आली आहे. या कारवाईमुळे पुण्यासह नागपूर आणि गुजरातमधील द्वारका येथील अशा प्रकारचे 3 गुन्हे उघडकीस आले आहेत.
या प्रकरणाची सुरुवात 20 ऑगस्ट 2026 रोजी झाली. एक 79 वर्षीय ज्येष्ठ नागरिक बोरिवलीहून स्वारगेटच्या दिशेने शिवशाही बसने प्रवास करत होते. त्यावेळी आरोपीने स्वतःची ओळख संजय अग्रवाल अशी करून दिली. त्यानंतर त्याने संबंधित प्रवाशाला गुंगीच्या गोळ्या खाण्यास दिल्या. प्रवासी गुंगीत असल्याची संधी साधून त्याच्या उजव्या हातातील 10 ग्रॅम वजनाची सोन्याची अंगठी चोरून नेली.
या घटनेचा तपास करताना पोलिसांनी बसमधील सीसीटीव्ही फुटेज तपासले. तांत्रिक माहिती आणि गोपनीय बातमीदारांकडून मिळालेल्या माहितीच्या आधारे आरोपीची ओळख पटवण्यात आली. त्यानंतर पोलिसांनी उज्जैनमध्ये शोधमोहीम राबवून बाबू भुरेखान याला ताब्यात घेतले.
तपासादरम्यान आरोपीकडून ALPRAZ 0.5 या गुंगीकारक गोळ्यांची 15 गोळ्या असलेली 2 पाकिटेही जप्त करण्यात आली. आरोपीने यापूर्वी अशाच प्रकारच्या गुन्ह्यात शिक्षा भोगली असल्याची माहिती पोलिसांनी दिली आहे. मात्र, त्यानंतरही तो पुन्हा अशा गुन्ह्यांमध्ये सहभागी झाल्याचे तपासात समोर आले.
स्वारगेटचे वरिष्ठ पोलीस निरीक्षक यशवंत निकम यांनी दिलेल्या माहितीनुसार, गोळ्या खाल्ल्यानंतर संबंधित ज्येष्ठ नागरिकाची प्रकृती गंभीर झाली होती. त्यांना थेट अतिदक्षता विभागात दाखल करण्याची वेळ आली होती. दरम्यान, या प्रकरणाचा पुढील तपास पोलीस करत आहेत.
