ICC World Cup 2023 : नवी दिल्ली : अफगाणिस्तानने आयसीसी क्रिकेट विश्वचषकाच्या १३ व्या सामन्यात गतविजेत्या इंग्लंडचा ६९ धावांनी मोठा पराभव केला आहे. इंग्लंड संघाचा विश्वचषकातील हा दुसरा पराभव आहे. याआधी इंग्लंडला पहिल्या सामन्यात न्यूझीलंडकडून पराभव स्वीकारावा लागला होता. इंग्लंडला बांगलादेशविरुद्ध एक विजय मिळाला आहे.
इंग्लंडचा ६९ धावांनी पराभव
इंग्लंडला पराभूत केल्यानंतर अफगाणिस्तानने वनडे वर्ल्डकप २०२३ च्या पॉईंट्स टेबलमध्ये आपलं खातं उघडलं. दरम्यान याचा फटका ऑस्ट्रेलियाचा टीमला देखील बसला आहे.
अफगाणिस्तानचा तीन सामन्यांमधला हा पहिला विजय आहे. यापूर्वी बांगलादेश आणि भारताविरुद्ध संघाला पराभवाचा सामना करावा लागला होता. इंग्लंडविरुद्धच्या सामन्यात प्रथम फलंदाजी करताना अफगाणिस्तानने ४९.५ षटकांत सर्व गडी गमावून २८४ धावा केल्या. प्रत्युत्तरात इंग्लंडचा संघ ४०.३ षटकांत केवळ २१५ धावाच करू शकला.
प्रथम फलंदाजी करताना अफगाणिस्तानची सुरूवात चांगली झाली. सलामीवीर रहमानउल्ला गुरबाज आणि इब्राहिम झद्रान यांनी वर्ल्ड कपमधील ११४ धावांची विक्रमी भागेदारी केली. अखेर अफगाणिस्तानने ४९.५ ओव्हरमध्ये २८४ रन्स करत ऑलआऊट झाली.
दरम्यान, अफगाणिस्तानने दिलेल्या २८५ रन्सचं आव्हान पार करताना इंग्लंडची सुरूवात खराब झाली. जॉनी बेअरस्टो आणि जो रूट लवकर बाद झाले. त्यानंतर सलामीवीर डेविड मलान आणि हॅरी ब्रूक यांनी इंग्लंडला सावरलं. मात्र, लियाम लिव्हिंगस्टोन, सॅम करन, ख्रिस वोक्स आणि जॉस बटलर हे तगडे फलंदाज सपशेल फेल ठरले. अखेर अफगाणिस्तानच्या गोलंदाजीसमोर इंग्लंडच्या टीमने गुडघे टेकले.
इंग्लंडच्या पराभवाचा मोठा फटका ऑस्ट्रेलियाला..
पाच वेळा विश्वविजेती असलेल्या ऑस्ट्रेलियाच्या टीमला वर्ल्डकपमध्ये एकाही सामन्यात विजय मिळवता आलेला नाही. रविवारी होणाऱ्या सामन्यापूर्वी अफगाणिस्तानची टीम १० व्या नंबरवर होती. तर नवव्या क्रमांकावर ऑस्ट्रेलिया होती. मात्र अफगाणिस्तानच्या विजयाने ऑस्ट्रेलियाची टीम १० क्रमांकावर पोहोचली आहे. त्यामुळे इंग्लंडच्या पराभवाचा मोठा फटका ऑस्ट्रेलियालाही बसला आहे.
