इस्लामाबाद: पाकिस्तानचा स्टार अष्टपैलू खेळाडू इमाद वसीम (Divorce News) सध्या क्रिकेटमधील कामगिरीमुळे नव्हे, तर त्याच्या वैयक्तिक आयुष्यातील एका वादळामुळे चर्चेत आला आहे. इमादने नायला राजा नावाच्या महिलेशी दुसरा निकाह केल्याची घोषणा करताच, त्याची पहिली पत्नी सानिया अशफाक हिने इमादवर फसवणुकीचे आणि ‘स्वतःच्या मुलाची हत्या’ केल्याचे खळबळजनक आरोप केले आहेत. या आरोपांमुळे क्रीडा विश्वात एकच खळबळ उडाली आहे.
इमाद आणि सानिया यांचा निकाह 2019 मध्ये झाला होता. त्यांना तीन मुले आहेत. गेल्या वर्षी डिसेंबरमध्ये या दोघांनी घटस्फोटाची अधिकृत घोषणा केली होती. मात्र, इमादच्या दुसऱ्या लग्नानंतर सानियाचा संयम सुटला. तिने इंस्टाग्रामवर पोस्ट शेअर करत इमादला ‘धोकेबाज’ म्हटले असून, त्याने आपल्या मुलांचा विचार न करता हे पाऊल उचलल्याचा दावा केला आहे. सानियाने इमादवर आपल्या मुलाची हत्या केल्याचा जो अत्यंत गंभीर आरोप केला आहे, त्याने या प्रकरणाला गंभीर वळण दिले आहे.
37 वर्षीय इमाद वसीमने या आरोपांवर आपली बाजू मांडताना म्हटले आहे की, पहिल्या लग्नानंतरचा काळ चांगला नव्हता. नायलामुळे आयुष्यात सुख-शांती आली असून, पालकांच्या संमतीनेच दुसऱ्या निकाहचा निर्णय घेतला आहे. आपल्या मुलांवर आपले प्रेम असून त्यांच्या जबाबदाऱ्या आपण पार पाडणार असल्याचेही त्याने स्पष्ट केले. मात्र मुलाच्या हत्येबद्दलची अधिक माहिती समोर आली नाही.
