शिरूर ता.27: शिरूर शहराजवळील पुणे-अहिल्यानगर महामार्गावर सतरा कमान पुल येथे भरधाव वेगात असलेल्या एका अज्ञात वाहनाने बुलेट गाडीला जोरदार धडक देऊन झालेल्या अपघातात शिरूर परिसरातील पाचर्णेमळा येथील युवकाचा मृत्यू झाल्याची घटना घडली आहे. अपघातामध्ये सोमेश्वर बबन पाचर्णे ( वय-३२ वर्षे,तर्डोबाचीवाडी पाचर्णेमळा, ता.शिरुर, जि.पुणे ) या तरुणाचा दुर्दैवीरीत्या मृत्यू झाला आहे. या घटनेबाबत बाळू शंकर पाचर्णे ( पाचर्णेमळा तर्डोबाचीवाडी, ता.शिरुर, जि.पुणे ) यांनी शिरूर पोलीस ठाण्यात फिर्याद दाखल केली आहे.
घटनेची शिरूर पोलिसांनी दिलेली सविस्तर माहिती अशी की, बुधवारी ( दि.२६ ) रात्री अकरा वाजता सोमेश्वर पाचर्णे हा त्याच्या बुलेट दुचाकीवरून पुणे-अहिल्यानगर महामार्गावर अहिल्यानगरच्या बाजूने जात असताना, शिरूर जवळील सतरा कमान पुलाजवळ भरधाव वेगात असलेल्या अज्ञात वाहनाने त्याच्या बुलेट मोटरसायकलला जोरदार धडक दिली. त्यामुळे झालेल्या अपघातात बुलेट चालक सोमेश्वर पाचर्णे याच्या डोक्याला जोरदार मार लागला तसेच हात व पायाला गंभीर दुखापत झाली त्यामुळे सोमेश्वर याचा जागीच मृत्यू झाला. अपघातानंतर अज्ञात वाहन चालक कुठली खबर न देता वाहन घेऊन पळून गेला आहे. त्यामुळे अज्ञात वाहनचालका विरोधात शिरूर पोलीस स्टेशन येथे गुन्हा दाखल करण्यात आला असून, पुढील तपास शिरूर पोलीस स्टेशनचे पोलीस निरीक्षक संदेश केंजळे यांच्या मार्गदर्शनाखाली पोलीस हवालदार दीपक राऊत करीत आहे.
