गोरख जाधव
डोर्लेवाडी, ता. 03 : महाराष्ट्र राज्य उच्च व तंत्र शिक्षण विभाग आणि महाराष्ट्र माहिती तंत्रज्ञान सहाय्यता केंद्र यांच्या संयुक्त विद्यमाने, राबविण्यात येणाऱ्या “करिअर कट्टा” या उपक्रमात बारामती येथील विद्या प्रतिष्ठान कला, विज्ञान व वाणिज्य महाविद्यालयाने पुणे विभाग व जिल्ह्यात प्रथम क्रमांक पटकावला.
यंदाच्या पुरस्कार वितरण सोहळ्याचे आयोजन पिंपरी चिंचवड कॉलेज ऑफ इंजिनिअरिंग, निगडी येथे करण्यात आले होते. महाराष्ट्र राज्य उच्च व तंत्र शिक्षण विभागाचे संचालक डॉ. शैलेंद्र देवळाणकर यांच्या हस्ते हा पुरस्कार प्रदान करण्यात आला. प्राचार्य डॉ. भरत शिंदे यांच्या वतीने करिअर कट्टा महाविद्यालय समन्वयक डॉ. सुनील ओगले, जिल्हा समन्वयक डॉ. संजय खिलारे व डॉ. आनंदा गांगुर्डे यांनी पुरस्कार स्वीकारला.
या सोहळ्याला दुबई सरकारचे तांत्रिक सल्लागार सोमनाथ पाटील, आर्थिक विकास महामंडळाचे संचालक सचिन ईटकर, पिंपरी चिंचवड एज्युकेशन ट्रस्टचे कार्यकारी संचालक डॉ. गिरीश देसाई आणि महाराष्ट्र माहिती तंत्रज्ञान सहाय्यता केंद्राचे संचालक यशवंत शितोळे उपस्थित होते. या उपक्रमांतर्गत महाविद्यालयांमध्ये विद्यार्थ्यांसाठी विविध अभ्यास पूरक व कौशल्यविकास उपक्रम राबविले जातात.
विद्यार्थ्यांना मार्गदर्शन करताना डॉ. शैलेंद्र देवळाणकर यांनी सांगितले की, “आजच्या युगात केवळ पदवी आणि स्पर्धा परीक्षा पुरेशा नाहीत. विद्यापीठीय शिक्षणासोबतच कौशल्य आधारित शिक्षण अनिवार्य झाले आहे. प्लंबिंग, इलेक्ट्रिशियन, लॉन्ड्री सेवा, वाहनचालक अशा व्यवसायांची आज मोठी गरज आहे. पुढील वर्षी अशा कौशल्यप्राप्त विद्यार्थ्यांचा सत्कार करण्यात येईल.”
महाराष्ट्र माहिती तंत्रज्ञान सहाय्यता केंद्राचे संचालक यशवंत शितोळे यांनी करिअर कट्टाच्या उपक्रमांबाबत माहिती दिली. पुणे विभागातील एकूण 71 महाविद्यालयांना पुरस्कार प्रदान करण्यात आले. या सोहळ्याचे सूत्रसंचालन डॉ. आनंदा गांगुर्डे यांनी केले, तर जिल्हा समन्वयक डॉ. संजय खिलारे यांनी आभार मानले.
दरम्यान, या वेळी पुणे, अहिल्यानगर आणि नाशिक जिल्ह्यातील महाविद्यालयांचे प्राचार्य, प्राध्यापक, विद्यार्थी आणि तालुका समन्वयक मोठ्या संख्येने उपस्थित होते.
