पुणे : यंदा हिवाळ्यात पावसाने अचानक हजेरी लावल्याने शेतकरी अडचणी सापडल्याच चित्र दिसत आहे. येत्या तीन दिवसांत राज्यातील काही भागांमध्ये ढगाळ वातावरण आणि मेघगर्जनेसह तुरळक पाऊस पडण्याचा अंदाज हवामान विभागानं वर्तवला आहे. प्रामुख्यानं बुलढाणा, अकोला, अमरावती, नागपूरात पावसाचा इशारा देण्यात आला आहे. खान्देशातील काही भाग आणि नाशिक, अहमदनगर, छत्रपती संभाजीनगर, पुणे, सातारा, सांगली, कोल्हापूर, सोलापूरमध्ये मंगळवारी तुरळक पावसाची शक्यता हवामान विभागानं वर्तवली आहे.
विदर्भ वगळता राज्यात पुढील ३ दिवस मेघगर्जना, विजांच्या कडकडाटासह हलक्या ते मध्यम पावसाचा अंदाज हवामान विभागाने वर्तवला आहे. तर ३ दिवसानंतर ढगाळ वातावरण कमी होऊन पुन्हा थंडी वाढण्याची शक्यताही हवामान विभागाने व्यक्त केली आहे. अरबी समुद्रावर हवेची चक्रीय स्थिती निर्माण झाल्याने अवकाळी संकट कोसळल्याचं समोर आलं आहे. थंड वारे आणि बाष्पयुक्त वाऱ्याच्या संयोगामुळे काही भागात मुसळधार पाऊस पडण्याची शक्यता आहे.
राज्यातील काही भागामध्ये पहाटे धुके पडण्याचीही शक्यता आहे. तसेच जळगावात सर्वात कमी 12.4 अंश सेल्सिअस इतक्या कमी तापमानाची नोंद झाली होती. सोमवारी धुळे आणि नंदूरबारमध्ये यलो अलर्ट देण्यात आला आहे. तर धुळे, जळगाव, नाशिक, नगर, छत्रपती संभाजीनगर या जिल्ह्यांना मंगळवारी यलो अलर्ट मिळाला आहे. त्यामुळे आता शेतकरी पुन्हा अडचणी सापडल्याचं पहायला मिळत आहे.
महाराष्ट्रात ढगाळ वातावरण व अति हलक्या स्वरूपाचा पाऊस
राज्यात पश्चिमी वेस्टर्न डिस्टर्बन्समुळे वायव्य दिशेकडून येणारे वारे आणि आग्नेय दिशेकडून येणारे आर्द्रता युक्त वारे यांच्या परस्पर क्रियेमुळे मध्य भारतात तसेच महाराष्ट्र राज्यात ढगाळ वातावरण आणि अति हलक्या स्वरूपाचा पाऊस पडण्याची शक्यता वर्तवली आहे. याशिवाय तामिळनाडू आणि केरळमध्ये देखील अवकाळी पावसाचा अंदाज वर्तवण्यात आला आहे. राज्यावर पुन्हा अवकाळी पावसाचं संकट असल्याने शेतकरी मात्र चिंतेत आहे. हातातोंडाशी आलेला घास अवकाळीमुळे मातीत जाण्याची शक्यता आहे.
