पुणे : दि पुणे डिस्ट्रिक्ट पोलिस को-ऑप. क्रेडिट सोसायटीच्या अध्यक्षपदी लोणी काळभोरचे (ता. हवेली) सुपुत्र असलेले पोलीस उपनिरीक्षक उदय सुदाम काळभोर यांची बिनविरोध निवड झाली आहे. या निवडीमुळे लोणी काळभोरसह परिसरात आनंदाचे वातावरण पसरले आहे.
दि पुणे डिस्ट्रिक्ट पोलिस को-ऑप. क्रेडिट सोसायटीच्या कार्यालयात संचालक मंडळातून पदाधिकारी निवडीची प्रक्रिया आज गुरुवारी (ता.28) पार पडली. ही निवडणूक प्रक्रिया निवडणुक अध्यासी अधिकारी तथा सहकारी संस्थेचे उपनिबंधक नीलम पिंगळे यांच्या अध्यक्षतेखाली पार पडली. या निवडणूक प्रक्रियेत अध्यक्षपदी उदयकुमार काळभोर, उपाध्यक्षपदी सुमित लहू कदम, मानद सचिव पदी जमीर बाबालाल तांबोळी ,खजिनदार पदी दिनेश प्रल्हाद गडांकुश याची सर्वानुमते बिनविरोध निवड करण्यात आली आहे.
दि पुना डिस्ट्रीक्ट पोलीस को-ऑप क्रेडिट सोसायटी लि. पुणे या संस्थेची स्थापना सन 1920 साली करण्यात आली आहे. संस्थेचे गेल्या 105 वर्षात दर दहा वर्षांनी सुमारे 1 हजार नवीन सभासदांची वाढ होत गेली असून सध्या संस्थेचे एकूण 14 हजार 883 सभासद आहेत. संस्थेचे सध्याचे भागभांडवल व संचित ठेवी एकूण रूपये 408 कोटी 51 लाख आहे. सभासद व सेवानिक्तृत्त सभासद यांच्या एकूण 82 कोटी 46 लाख रुपये इतक्या मुदत ठेवी आहेत. संस्थेने सन 2024-25 या आर्थिक वर्षात 3282 कोटी इतकी वार्षिक उलाढाल झालेली आहे. संस्थेने पोलीस अधिकारी व अंमलदार यांना 949 कोटी 13 लाख इतके कर्ज वितरीत केलेले आहे.
दरम्यान, दि पुणे डिस्ट्रिक्ट पोलिस को-ऑप. क्रेडिट सोसायटीच्या संचालक मंडळाची सन 2024 ते 2029 या कालावधीकरिता निवडणूक प्रक्रिया गतवर्षी पार पडली होती. या निवडणूकीत नवपरिवर्तन पॅनेलच्या 13 जागांपैकी 12 जागांवर दणदणीत विजय मिळवला आहे. नवपरिवर्तन पॅनेलकडून उदय काळभोर, सुमित कदम, शशिकांत नरुटे ,विठ्ठल घोरपडे, राजेंद्र मारणे, जमीर तांबोळी, दिनेश गडांकुश, अनिल गावडे, वैशाली गोडगे-बनकर , आशा राठोड, आकाश फ़ासगे, गणपत गोरे हे विजयी झाले होते.
यावेळी बोलताना नवनिर्वाचित अध्यक्ष उदय काळभोर म्हणाले की, या संस्थेच्या माध्यमातून कर्ज योजना, गृह कर्ज योजना, तारण कर्ज योजना, शैक्षणिक गुणवत्ता बक्षिस योजना प्रामाणिकपणे राबविणार आहे. दि पूना डिस्ट्रीक्ट पोलिस को-ऑप क्रेडीट सोसायटीचा नावलौकिकता वाढविण्यासाठी व सभासदांना हक्क मिळवून देण्यासाठी प्रयत्न करणार आहे. तसेच मला बिनविरोध निवडून दिल्याबद्दल मी सर्वांचे आभार मानतो.
