पुणे : पुण्यातील गुन्हे शाखेच्या युनिट 4 च्या पथकाने केलेल्या कारवाईत कुख्यात बाबा शेख टोळीचा सदस्य असलेल्या तडीपार गुंडाला अटक करण्यात आली आहे. पवन देवेंद्र बनेटी (वय 24, रा. राजीव गांधी झोपडपट्टी, पिंपळे गुरव, सांगवी) असे अटकेत घेतलेल्या गुंडाचे नाव आहे. पोलिसांनी त्याच्याकडून 2 पिस्टल आणि 2 जिवंत काडतुसे जप्त केली आहेत.
पवन बनेटी हा पुण्यातील गुन्हेगारी जगतातला परिचित चेहरा आहे. बाबा शेख टोळीचा सक्रिय सदस्य म्हणून त्याने आपली ओळख निर्माण केली आहे. त्याच्याविरुद्ध आधीच दोन गंभीर स्वरूपाचे गुन्हे नोंदले गेले आहेत. याशिवाय, त्याच्या विरुद्ध महाराष्ट्र संघटित गुन्हेगारी नियंत्रण कायदा (मोक्का) अंतर्गतही गुन्हा दाखल करण्यात आला होता. त्याला न्यायालयाने जामीन मंजूर केल्यानंतर पोलिसांनी त्याला पुणे जिल्ह्यातून दोन वर्षांसाठी तडीपार केले होते. मात्र, तडीपार आदेश धुडकावून तो पुन्हा शहरात परतला आणि बेकायदेशीर शस्त्र बाळगू लागल्याची माहिती पोलिसांना मिळाली होती.
गुन्हे शाखेच्या युनिट 4 चे पथक अवैध शस्त्रे बाळगणाऱ्यांवर लक्ष ठेवून होते. दरम्यान, रेकॉर्डवरील तडीपार गुंड पवन बनेटी हा पिंपळे निलख परिसरात येणार असल्याची गुप्त माहिती पोलिसांना मिळाली. त्याच्याकडे पिस्तूल असल्याचाही सुगावा लागला. त्यानुसार पोलिसांनी सापळा रचून त्याला अटक करण्यात यश मिळवले. या कारवाईत पोलिसांनी त्याच्याकडून दोन पिस्तुले आणि दोन जिवंत काडतुसे हस्तगत केली आहेत. सांगवी पोलीस ठाण्यात त्याच्याविरुद्ध आर्म अॅक्ट अंतर्गत गुन्हा दाखल करण्यात आला आहे. या कारवाईमुळे परिसरातील नागरिकांनी सुटकेचा श्वास सोडला आहे.
ही कारवाई पोलीस आयुक्त विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उपायुक्त डॉ. शिवाजी पवार आणि सहायक पोलीस आयुक्त डॉ. विशाल हिरे यांच्या मार्गदर्शनाखाली करण्यात आली. कारवाईत पोलीस निरीक्षक अरविंद पवार, पोलीस उपनिरीक्षक भरत गोसावी, मयुरेश साळुंखे, संजय गवारे, प्रविण दळे, नितीन ढोरजे यांच्यासह पोलीस हवालदार कृणाल शिंदे, सुरेश जायभाये, तुषार शेटे, मोहम्मद गौस नदाफ, भाऊसाहेब राठोड आणि पोलीस अंमलदार प्रशांत सैद, गोविंद चव्हाण, सुखदेव गावंडे, अमर राणे, दिनकर आडे, रवी पवार, धनंजय जाधव यांनी सहभाग घेतला.
