पुणे : तरुणी किराणा दुकानातून सामान घेऊन घरी जात असताना, तरुणीला भररस्त्यात अडवून, तिच्यासोबत अश्लील भाषेत बोलून लगट करणाऱ्या रोड रोमिओला पिंपरी पोलिसांनी गजाआड केले. अजमेरा कॉलनीत पीडित तरुणीच्या घरासमोर हा प्रकार घडला. रविवारी (ता. २८) रात्री साडेनऊ वाजण्याच्या सुमारास ही घटना घडली.
याबाबत पीडित तरुणीने पिंपरी पोलीस ठाण्यात दिलेल्या फिर्यादीनुसार, अक्षय हुलावळ (वय २०, रा. टेल्कोग्राउंड, अजमेरा, पिंपरी) याच्यावर गुन्हा दाखल करुन अटक केली आहे. याबाबत पोलिसांनी दिलेल्या माहितीनुसार, पीडित तरुणी व आरोपी एकमेकांच्या परिचयाचे आहेत. तरुणी किराणा दुकानातून सामान घेऊन घरी जात असताना आरोपीने तिचा पाठलाग केला. तसेच फिर्यादी तिच्या राहत्या घरासमोर आली असता, आरोपीने तिचा हात पकडून तिच्यासोबत लगट करण्याचा प्रयत्न केला. त्यावेळी तरुणीने त्याला कडाडून विरोध केला.
दरम्यान, तरुणाच्या या कृत्याचा राग आल्याने आरोपीने तिच्यासोबत अश्लील बोलून स्त्री मनास लज्जा उत्पन्न होईल असे कृत्य केले. त्यानंतर पोलिसांनी आरोपीला ताब्यात घेतले. या घटनेचा पुढील तपास पोलीस उपनिरीक्षक देशमुख करीत आहेत.
