गोरख जाधव
डोर्लेवाडी : कऱ्हा नदी पात्रात एका अनोळखी पुरुषाचा मृतदेह आढळून आहे. गुरुवारी (ता. 02) सकाळी हा मृतदेह डोर्लेवाडी (ता. बारामती) हद्दीत आढळून आला आहे. या घटनेने परिसरात खळबळ उडाली आहे.
मिळालेल्या माहितीनुसार, गुरुवारी सकाळी काही ग्रामस्थ नदीकाठी मासे पकडण्यासाठी गेले होते. यावेळी काही नागरिकांना कऱ्हा नदी पात्रात एका पुरुषाचा मृतदेह पाण्यावर तरंगत असल्याचे आढळून आले. यावेळी ग्रामस्थांनी गावाचे पोलीस पाटील नवनाथ मदने यांना तात्काळ माहिती दिली. त्यानंतर पोलीस पाटीलांनी सदरची माहिती बारामती शहर पोलिसांना कळवली. त्यानुसार, घटनास्थळी पोलीस शिपाई गिरीश नेवसे हे एकटे आले होते.
सकाळी दिसून आलेला मृतदेह तब्बल सहा तास उलटल्यानंतरहि त्याच जागेवर बेवारसपणे पडून होता. पोलीस शिपाई नेवसे यांनी डोर्लेवाडी प्राथमिक आरोग्य केंद्र, ग्रामपंचायत डोर्लेवाडी, बारामती नगरपालिका, या सर्वांना मदतीसाठी फोन केले. मात्र, वेगवेगळे कारण सांगून हात झटकून मागे सरकले. यामुळे तो मृतदेह बाहेर काढण्यासाठी जवळ जवळ 6 तास उलटून गेले होते. तरीही तो मृतदेह बेवारसपणे पाण्यामध्ये पडून होता. या प्रशासनाच्या भोंगळ कारभारामुळे मृतदेह बाहेर काढण्यासाठी विलंब झाला होता.
यावेळी गावातील काही तरुणांनी माणुसकी दाखवत शेवटी एकत्र येत पाण्यामध्ये उतरून तो मृतदेह बाहेर काढला. मृतदेह हा सडलेला असल्याने त्याच्या दुर्गंधी सर्वत्र पसरली होती. तरीही तरुणांनी ते प्रेत बाहेर काढून पोलीस शिपाई यांच्या ताब्यात देत पुढील कारवाही साठी पंचनामा करून शवविच्छेदनासाठी ग्रामीण रुग्णालयात हलविण्यात आला. मृतदेह दोन ते तीन दिवसांपूर्वीचा असल्याचा प्राथमिक अंदाज व्यक्त करण्यात येत आहे. मृत्यूचे नेमके कारण मात्र अद्याप स्पष्ट झालेले नाही.
दरम्यान, मृताची ओळख पटवण्याचे प्रयत्न सुरू असून तो स्थानिक रहिवासी आहे की बाहेरून आलेला, याबाबत बारामती शहर पोलिस तपास करत आहेत. या घटनेमुळे डोर्लेवाडी परिसरात एकच खळबळ उडाली असून ग्रामस्थांमध्ये भीतीचे वातावरण निर्माण झाले आहे. पोलिसांनी परिसरातील गावकऱ्यांकडून माहिती घेतली असून हरविलेल्या व्यक्तींच्या नोंदी तपासल्या जात आहेत. तपास पूर्ण झाल्यानंतरच मृत्यू अपघाती आहे की इतर काही कारणामुळे, हे स्पष्ट होणार आहे. पुढील तपास बारामती शहर पोलीस करत आहेत.
