दौंड: मुळा-मुठा नदी पात्रात पोत्यात (Daund News) बांधलेल्या अवस्थेत एका 30 ते 35 वयोगटातील एका (Pune News) अनोळखी पुरुषाचा मृतदेह आढळून आल्याची घटना उघडकीस आली आहे. खामगाव (ता. दौंड) गावच्या हद्दीत सोमवारी (ता. 29) ही घटना उघडकीस आली आहे. पावसामुळे नदीचे पाणी मोठ्या प्रमाणात वाहत असल्याने अज्ञात आरोपींनी याचा फायदा घेत सदर इसमाचा खून करून हा मृतदेह मुळा मुठा नदीच्या पाण्यात फेकून दिल्याची शंका पोलिसांनी उपस्थित केली आहे.
मिळालेल्या माहितीनुसार, मुळा-मुठा नदीच्या पाण्यात अनोळखी पुरुषाचा मृतदेह पाण्यावर तरंगत असल्याची माहिती खामगावचे पोलीस पाटील प्रदीप जगताप यांनी यवत पोलिसांना दिली होती. सदर घटनेची माहिती मिळताच यवत पोलीस ठाण्यातील पोलीस उपनिरीक्षक अक्षय मोरे, पोलीस हवालदार गणेश करचे, संदिप देवकर, विनायक हाके, दत्तात्रय काळे यांच्या पथकाने घटनास्थळी जात घटनेचा पंचनामा करीत मृतदेह ताब्यात घेतला.
यावेळी अनोळखी पुरुषाचे वय अंदाजे 30 ते 35 वयोगटातील असून उजव्या हातावर बदाम आणि महादेवाची पिंड गोंदलेली आहे. उजव्या हाताच्या दंडावर सिंहाचे टँट्यु गोंदलेले असून डाव्या हाताच्या पोटरीवर बदाम त्यामध्ये SLG असे गोंदलेले आहे. अंगावर लाल रंगाचा टीशर्ट आणि राखाडी रंगाची पॅन्ट घातलेली असून कमरेला चामडी बेल्ट घातलेला आहे.
दरम्यान, आढळून आलेल्या अज्ञात मृतदेहाची अद्यापी ओळख पटू शकली नसून अज्ञात पुरुषाबाबत कोणास माहिती असल्यास यवत पोलीस ठाण्याशी संपर्क साधण्याचे आवाहन पोलिसांनी केले आहे. अज्ञात आरोपी विरोधात खुनाचा गुन्हा दाखल केला असून अधिक तपास सहाय्यक पोलीस निरीक्षक गणेश सपांगे करीत आहेत.
