लोणी काळभोर, (पुणे) : गावगाड्यातील मिनी मंत्रालय समजल्या जाणाऱ्या ग्रामपंचायतींच्या सरपंचपदासाठी आरक्षणाची सोडत बुुधवारी काढण्यात आली. यामुळे ‘कहीं खुशी, कहीं गम’ असे संमिश्र चित्र पाहायला मिळाले. हवेली तालुक्यातील 66 ग्रामपंचायतींच्या सरपंचपदाचे आरक्षण सोडतीद्वारे निश्चित करण्यात आले. उर्वरित 5 ग्रामपंचायतींचे आरक्षण अगोदर काढण्यात आले होते.
हवेली तालुक्याचे तहसीलदार किरण सुरवसे, अप्पर तहसीलदार तृप्ती कोलते यांच्या उपस्थितीत पुढील 2025 ते 2030 या पाच वर्षांसाठी ग्रामपंचायत सरपंच आरक्षण ठरले. आरक्षण सोडत काढताना गावागावांतील अनेक इच्छुक मंडळी उपस्थित होती. यात आरक्षणाचा फटका बसल्यामुळे काही जणांच्या पदरी निराशा आली, तर पूरक आरक्षणामुळे सरपंचपदाची संधी मिळण्याच्या आशेमुळे बरेच इच्छुक आजपासूनच कामाला लागले आहेत. विशेषतः राजकीयदृष्ट्या संवेदनशील असलेल्या आणि तालुक्यातील बड्या राजकीय नेत्यांशी संबंधित असलेल्या गावांच्या ग्रामपंचायतींमध्ये सरपंच आरक्षणाकडे सर्वांचे लक्ष वेधले होते. यात काहीजणांनी समाधानाचा सुस्कारा सोडला. तर काहीजणांच्या आशेवर पाणी फेरले गेल्याचे दिसून आले.
हवेली तालुक्यातील 71 ग्रामपंचायतच्या सरपंचपदाचे आरक्षण सोडतीतून ठरले. यात लोणी काळभोर, कदमवाकवस्ती, थेऊर, कुंजीरवाडी, म्हातोबा आळंदी आदी नेहमीच राजकीयदृष्ट्या चर्चेत राहणाऱ्या गावांमध्ये सरपंचपदाचे आरक्षण खुल्या गटातील महिलेला लाभले. तर उरुळी कांचन गावाच्या सरपंचपदाचे आरक्षण खुल्या गटातील पुरुषाला मिळाले आहे.
यावेळी उपस्थित नागरिकांनी आपापल्या गावातील ग्रामपंचायतीच्या सरपंच पदाच्या आरक्षणाबाबतीत तोंडी आक्षेप तहसीलदारांकडे नोंदवले. तहसीलदारांनी सर्वांचे सविस्तर आक्षेप ऐकून घेतले. यावेळी ते म्हणाले निवडणूक आयोगाचे मार्गदर्शन व निर्देशानुसार हि आरक्षण सोडत होत आहे. या सोडती बाबतीत कुणालाही काही आक्षेप असतील तर त्यांनी माझ्याकडे किंवा जिल्हाधिकाऱ्यांकडे लेखी नोंदवावे. प्रत्येक आक्षेपाचे कायदेशीर निराकरण करण्यात येईल.
आरक्षण सोडतीनंतर निश्चित झालेले सरपंच पदाचे आरक्षण
सर्वसाधारण –
वडगांव शिंदे, फुलगाव, बहुली, अहिरे, मालखेड, खानापुर, डोणजे, गोऱ्हे खुर्द, सोनापुर, बकोरी, बिवरी, शिरसवडी, तुळापुर, पिंपरी सांडस, पेरणे, वाडेबोल्हाई, लोणीकंद, अष्टापुर, न्हावी-सांडस, उरुळीकांचन
सर्वसाधारण महिला –
कल्याण, मांजरी खुर्द, खडकवाडी, मांडवी बुद्रुक, आर्वी, गाऊडदरा, खेड शिवापूर, श्रीरामनगर, घेरासिंहगड, आव्हाळवाडी, आळंदी म्हातोबाची, कुंजीरवाडी, लोणी काळभोर, थेऊर, कदमवाकवस्ती, कोलवडी साष्टे, भवरापुर, हिंगणगांव, सांगवी सांडस व नायगाव.
नागरिकांचा मागास प्रवर्ग-
निरगुडी, मांडवी खुर्द, कुडजे, गोगलवाडी, कोंंढणपुर, डोंगरगाव, खामगाव टेक, सोरतापवाडी, गोऱ्हे बुद्रुक.
नागरिकांचा मागास प्रवर्ग महिला –
वडकी, जांभळी, आंबी, पेठ, प्रयागधाम, सागरुण, मणेरवाडी, शिवापूर, वढु खुर्द, कोरेगाव मुळ.
अनुसूचित जाती –
खामगाव मावळ, भावडी, बुर्केगाव, शिंदवणे, तरडे
अनुसूचित जाती महिला
आगळंंबे, वळती, रहाटवडे, केसनंद, टिळेकरवाडी.
अनुसूचित जमाती – शिंदेवाडी
अनुसूचित जमाती महिला – वरदाडे
दरम्यान, थेट जनतेतून सरपंच पदाची निवड असल्याने हवेली तालुक्याच्या ग्रामीण भागातून येणाऱ्या विविध राजकीय नेते मंडळीची उपस्थिती फारच कमी होती. अंदाजे दोनशे नागरिक यावेळी उपस्थित होते. जनतेतून सरपंचाची निवड होणार असल्याने निवडणूक लढवायला खुपच खर्च येतो. त्यामुळे इच्छुक आपोआपच कमी होतात अशी चर्चा यावेळी उपस्थितांमध्ये सुरु होती. आपल्या गावातील आरक्षण समजल्यानंतर नागरिक लगेच तेथून बाहेर पडत होते.
