शिरूर(पुणे): अहिल्यानगर-पुणे जिल्ह्याच्या सीमेवर दाणेवाडी (ता.श्रीगोंदा) येथील मृतदेहाचे इतर अवयव आज सकाळी (दि. 15 मार्च ) दुसऱ्या विहिरीमध्ये एका गाठोड्यामध्ये सापडल्यामुळे तो मृतदेह माऊली गव्हाणे याचाच असल्याचे स्पष्ट झाले आहे.
दाणेवाडी येथील पहिल्या विहिरीमध्ये अर्धवट विचित्र मृतदेह बुधवारी(दि. 12) सापडला होता. त्याच विहिरीच्या शेजारी आज(दि. 15) दुसऱ्या विहिरीमध्ये एक गाठोडे सापडले त्या गाठोड्यामध्ये शिर, दोन हात व एक पाय असे अवयव आढळून आले. त्यानंतर माऊली गव्हाणे याच्या आईने शिराच्या डाव्या कानातील बाळीवरून तो मृतदेह बेपत्ता असलेल्या माऊली याचाच असल्याचे सांगितले. यावेळी उपस्थितांनी हळहळ व्यक्त केली.
घटनेचा पुढील तपास व आरोपींचा शोध अहिल्यानगर पोलीस घेत असून, क्रूरपणे खून करणाऱ्या क्रूरकर्म्यांचा छडा लवकरच लावणार असल्याचे पोलिसांनी सांगितले.
