पुणे: भाजपचे नेते चंद्रकांत पाटील यांचे (Ravindra Dhangekar) निकटवर्तीय व्यावसायिक समीर पाटील (Sameer Patil) यांनी रवींद्र धंगेकर यांच्यावर (Pune News) मानहानी आणि अब्रुनुकसानीचा दावा केला होता. पुण्यातील कुख्यात गुंड निलेश घायवळ प्रकरणात रवींद्र धंगेकर यांनी वारंवार चंद्रकांत पाटील यांच्यावर आरोप करताना समीर पाटलांवरही हल्लाबोल चढवला होता. त्याच प्रकरणात आता रवींद्र धंगेकरांना न्यायालयाने दणका दिला आहे. समीर पाटील यांनी रवींद्र धंगेकर यांच्याविरोधात दिवाणी आणि फौजदारी दावा दाखल केला असून कोर्टाने आता याबाबतीत महत्वपूर्ण निर्णय सुनावला आहे. ‘समीर पाटील यांच्याविरोधात यापुढे कोणतंही वक्तव्य करू नका’ अशा सूचना न्यायालयाने रवींद्र धंगेकर यांना दिल्या आहेत.
पुण्यातील कुख्यात गुंड निलेश घायवळ या प्रकरणावर वक्तव्य करतांना रवींद्र धंगेकर यांनी वारंवार समीर पाटील यांच्यावर निशाणा साधला होता. समीर पाटील यांच्यावर मकोका अंतर्गत कारवाई झालेली आहे आणि त्यांचं या गुन्हेगारी टोळीसोबत साटंलोटं आहे असा आरोप करत धंगेकरांनी निशाणा साधला होता. यासंदर्भात धंगेकरांनी काही फोटो आणि पुरावेसुद्धा सादर केले होते. मात्र हे सर्व आरोप बिनबुडाचे असून याबाबत कोणताही ठोस संदर्भ किंवा पुरावा नसल्याचं सांगत समीर पाटलांनी हे आरोप वारंवार फेटाळून लावत हे आरोप राजकीय स्वार्थासाठी केले जात आहेत अशी भूमिका मांडली.
मात्र या सर्व आरोपानंतर समीर पाटील यांनी रवींद्र धंगेकरांना १४ ऑक्टोबर रोजी अब्रुनुकसानीची ५० कोटी रुपयांची नोटीस पाठवली होती. त्यानंतर समीर पाटील यांनी धंगेकरांविरोधात पुणे जिल्हा न्यायालयात दिवाणी खटला आणि फौजदारी मानहानीचा खटला दाखल केला होता. या दाव्याची सुनावणी ही २७ ऑक्टोबर २०२५ पासून सुरु झाली.
दरम्यान समीर पाटलांनी केलेल्या आरोपांवर आणि मांडलेल्या भूमिकेवर मात्र रवींद्र धंगेकरांकडून कोणतंही प्रतिउत्तर मिळालं नाही. त्यामुळेच न्यायालयातही धंगेकरांनी त्यांची बाजू मंडळी नसल्याचं समीर पाटील यांचं म्हणणं आहे. दरम्यान याबाबतीत खटला न्यायालयात सध्या सुरु असून खटला चालू असेपर्यंत समीर पाटलांबाबत कोणताही वक्तव्य करू नका अशा सूचना न्यायालयाने धंगेकरांना दिल्या आहेत.
