विशाल शिंदे
राजगडल: राजगड तालुक्यातील (Rajgad News) शिवकालीन पांदण, गाडी वहिवाट (Pune News) आणि शेत रस्त्यांच्या मोजणीचे काम आता अंतिम टप्प्यात आले आहे. भुमि अभिलेख विभागाच्या माध्यमातून तालुक्यातील ३४५ रस्त्यांची मोजणी करून हद्द निश्चित करण्यात आली असून, लवकरच या रस्त्यांना सरकारी क्रमांक देण्यात येणार आहेत.
राजगड तालुका तहसीलदार निवास ढाणे यांच्या देखरेखीखाली महसूल सेवा पंधरावड्यांच्या माध्यमातून आयोजित शिवार फेरी अभियानात गावांतील सर्व शेत, वहिवाट आणि पांदण रस्त्यांची मोजणी करण्यात येत आहे. या कामात प्रत्येक रस्त्याची नोंद सरकारच्या अधिकृत नकाशात केली जात आहे.
पानशेतजवळील निगडे मोसे येथे ग्राम महसूल अधिकारी हेमंत घोडके व भुमि अभिलेख विभागाचे भुमापकर पंकज शिंदे यांनी गावातील पांदण आणि वहिवाट रस्त्यांची पाहणी करून मोजणी केली. माजी जिल्हा परिषद सदस्य अमोल नलावडे म्हणाले, “गावातील सर्व पांदण व वहिवाट रस्त्यांची हद्द निश्चित होऊन कायदेशीर अभिलेखात नोंद होणार आहे. त्यामुळे शेतकऱ्यांसह रहिवाशांची गैरसोय दूर होईल व गावाच्या विकासाला चालना मिळेल.” यावेळी रामदास नलावडे, बबन नलावडे, जनार्दन नलावडे, सुभाष नलावडे, काळुराम नलावडे आदी उपस्थित होते.
