पुणे: पुण्याचे पोलीस आयुक्त अमितेश कुमार यांनी दिवाळी सणानिमित्त फटाका विक्री व साठा करण्यासाठी अधिकृतपणे परवानगी घेण्याची जाहीर सुचना केली होती. तसेच यामधील गैरप्रकार टाळण्यासाठी 600 रुपयांचे परवानगी शुल्क पोलीस उपायुक्त कार्यालयात भरण्याचे परिपत्रक काढले होते. यामुळे नागरिकांना दिलासा मिळाला होता. मात्र, पुण्याच्या पूर्व भागात पठाणी वसुली करण्यासाठी पोलिसांकडून नवीन फंडा तयार करण्यात आला आहे. पोलिसांनी फटाका स्टॉल धारकांकडून सरसकट 5 ते 10 हजार उकळल्याचा धक्कादायक प्रकार उघडकीस आला आहे. यामुळे पोलीस आयुक्तांनी दिलेल्या आदेशाची पोलिसांनीच पायमल्ली केल्याची जोरदार चर्चा नागरिकांमध्ये रंगली आहे.
पुणे शहर पोलीस आयुक्तालयाअंतर्गत 39 पोलीस स्टेशन कार्यरत आहेत. यामध्ये प्रत्येक पोलीस ठाण्याच्या हद्दीत अंदाजे 100 हून अधिक फटाका स्टॉल आहेत. तर पुणे शहरात 4 हजाराच्या आसपास फटाका स्टॉल आहेत. त्यामुळे एका स्टॉलकडून 10 हजार रुपयांप्रमाणे पैसे घेतले, तर 4 हजार स्टॉलकडून सुमारे 4 कोटींची रोकड जमा होणार आहे. गैरप्रकार टाळण्यासाठी नमूद केलेल्या शुल्काव्यतिरिक्त पोलिसांनी 5 ते 10 हजार उकळण्याची उठाठेव कशाला केली? एवढा पैसा कशासाठी आणि कोणासाठी गोळा केला जातोय? असा सवाल नागरिकांनी यावेळी उपस्थित केला आहे.
पोलीस सूत्रांकडून मिळालेल्या माहितीनुसार, फटाका विक्रेत्यांची कागदपत्रे वैध असल्याने त्यांना परवाने दिले आहेत. मात्र, पोलीस दलातील एका वरिष्ठ अधिकाऱ्याने सर्व पोलीस ठाण्यातील कर्मचाऱ्यांना फटाका स्टॉलकडून सरसकट पैसे गोळा करण्याचे टार्गेट दिले आहे. काही ठिकाणी ५ हजार, 7 हजार, तर काही ठिकाणी 10 हजार उकळण्यात आले आहेत. तसेच हे टार्गेट पूर्ण करण्यासाठी वेळोवेळी दबावसुद्धा आणला जात आहे. याचा फटका फटाका विक्रेत्यांना बसत आहे. पोलिसांकडून त्यांची लुट केली जात आहे. या वसुलीमुळे फटाका विक्रेते व पोलिसांमध्ये वादावादी होत आहेत. एका वरिष्ठ पोलीस अधिकाऱ्याचा अट्टाहास पोलिस कर्मचाऱ्यांसह सर्वसामान्य जनतेला महागात पडत असल्याची चर्चा पोलीस दलात दबक्या आवाजात सुरु आहे.
करोडो रुपयांची माया जाणार कोठे?
विक्रेत्यांनी फटाका स्टॉलसाठी अधिकृत परवानगी घेतली असतानादेखील पोलीस प्रशासनाकडून सरसकट पैसे उकळले जात आहे. ही रक्कम कोणाच्या तिजोरीत जमा होणार? हा अट्टाहास कशासाठी? याचे गौडबंगाल अजूनही समजलेले नाही. त्यामुळे एवढी गोळा केलेली माया कोठे जाणार? या प्रश्नाचे उत्तर अद्यापही गुपितच आहे.
कारवाई होणार?
पोलीस आयुक्त अमितेश कुमार यांनी दिलेल्या आदेशाला पुण्याच्या पूर्व भागात पोलिसांनी केराची टोपली दाखवून पठाणी वसुली सुरु केली आहे. पोलीस प्रशासनाच्या वतीने प्रत्येक स्टॉलकडून रोकड उकळली जात आहे. विक्रेते देखील पोलिसांच्या भीतीने पैसे देत आहेत. मात्र, अधिकृत परवानगी घेतली असतानाही पैसे उकळण्याचा अट्टाहास कशासाठी? ज्या वरिष्ठ अधिकाऱ्याने शासकीय शुल्काव्यतिरिक्त अनधिकृत पैसे गोळा करण्यास सांगितले आहे, त्या अधिकाऱ्यावर काय कारवाई होणार? याकडेही सर्वसामान्य नागरिकांचे लक्ष लागून राहिले आहे.
विक्रेत्यांना आर्थिक झळ
दिवाळी सणानिमित्त फटाका स्टॉल लावून आपली दिवाळी गोड करू, असा मानस व्यक्त करून काही तरुण फटाका स्टॉल लावत आहे. या स्टॉलसाठी तरुण मागील 10 दिवसांपासून ग्रामपंचायत, एमएसईबी, अग्निशमन दलाचे ना हरकत प्रमाणपत्र घेत आहेत. याबरोबरच चरित्र पडताळणी, हमीपत्र, आधारकार्ड व विविध कागदपत्रे गोळा करून पोलीस उपायुक्त कार्यालयात अर्ज करीत आहे. त्यानंतर त्यांना तात्पुरत्या स्वरुपात फटाके विकण्यासाठी परवानगी मिळत आहे. यामधून कुटुंबाचा उदरनिर्वाह चालेल इतकाच पैसा गोळा होणार आहे. मात्र, त्यातूनही पोलिसांकडून ५ ते १० हजार उकळले जात आहे. यामुळे पोलीस दलातील वरिष्ठ अधिकारी मालामाल होणार आहेत. मात्र, त्याची आर्थिक झळ विक्रेत्यांना बसत आहे.
