पुणे: एरंडवणा मधल्या एका रेस्टो बारमध्ये (Pune News) दोन दिवसांत दोन गंभीर प्रकार (Pune Crime) घडल्याने परिसरात खळबळ उडाली आहे. सोमवारी पहाटदीडच्या सुमारास केवळ धक्का लागल्याच्या कारणावरून चौघांनी एका तरुणाला मारहाण केल्याची घटना घडली. तर बुधवारी पहाटे त्याच बारमध्ये पाच जणांनी जबरदस्ती करून दारूची मागणी करत दरोडा टाकल्याची घटना उघड झाली. (Pune Breaking News)
पोलिसांनी दिलेल्या माहितीनुसार, ओंकार अनिल कदम (वय 27, रा. नारायण पेठ) आणि त्यांचा मित्र यश राहुल मारुलकर हे डी.पी. रोडवरच्या एका हॉटेलमध्ये जेवल्यानंतर बाथरूमसाठी एरंडवण्यातील एका बारमध्ये आले. बाथरूममधून बाहेर येताना ओंकार याचा एका तरुणाला धक्का लागला. त्या तरुणाने तत्काळ माफी मागितली. मात्र धक्का लागलेल्या व्यक्तीने रागात आपल्या चार साथीदारांना बोलावलं आणि त्यांनी ओंकार आणि त्याचा मित्र यांना विनाकारण मारहाण करायला सुरुवात केली. यापैकी एकाने लोखंडी कड्याने ओंकारच्या डोक्यावर मारून गंभीर दुखापत केली. डोक्यातून रक्त वाहू लागल्याने आरोपी लगेच पळून गेले.
या घटनेनंतर दोन दिवसांनी बुधवारी पहाटे जवळपास दीड वाजता पुन्हा त्याच बारमध्ये आणखी एक गंभीर प्रकार घडला. अनंत हॉटेल रेस्टो अँड बारमध्ये आवराआवरी सुरू असताना हुडी घातलेले पाच जण शटर उघडून आत घुसले. त्यांनी दारूची मागणी केली. व्यवस्थापकाने बार बंद झाल्याचे सांगितल्यावर त्यांनी कोयता दाखवून धमकावलं आणि गल्ल्यातील 15 ते 20 हजार रुपये जबरदस्तीने लुटून नेले.
या दोन्ही प्रकरणांमध्ये डेक्कन पोलिस ठाण्यात गुन्हे दाखल करण्यात आला आहे आणि याप्रकरणी पोलिस उपनिरीक्षक अजितकुमार पाटील पुढील तपास करत आहेत. सलग दोन दिवस एकाच बारमध्ये घडलेल्या घटनांमुळे परिसरात भीतीचे वातावरण निर्माण झाले आहे.
