Pune News पुणे : मुळशीतील शेतमजुराच्या तीन वर्षाच्या चिमुकल्याने शेतात खेळत असताना चुकून कीटकनाशक प्यायले होते. त्यानंतर या बालकावर ससून रुग्णालयातील बालराेग विभागात उपचार सुरू होते. (Pune News) अखेर डॉक्टरांनी 23 दिवस केलेल्या शर्थीच्या प्रयत्नानंतर या बालकाचे प्राण वाचले. (Pune News)
अरविंद जाधव असे त्या चिमुकल्याचे नाव असून, ताे मुळशी तालुक्यातील भादस या गावातील रहिवाशी आहे. त्याचे वडील राणू आणि आई सीता जाधव हे शेतमजूर आहेत. शेतात काम करताना त्यांचा लहान मुलगा बाजूला खेळत होता. शेतात कीटकनाशकाची पडलेली बाटली त्याने खेळता खेळता तोंडाला लावली. उशिराने ही बाब तेथे असलेल्या राहुल जोरी यांच्या लक्षात आली. पण तेव्हा त्याच्या तोंडातून फेस आला व वाफाही येत होत्या.
या घटनेनंतर चिमुकल्याला जवळच्या रुग्णालयात नेले. मात्र, ताे अत्यवस्थ असल्याने त्याला मोठ्या रुग्णालयात घेऊन जाण्याचा सल्ला दिला. बंडू जोरी, माधव जोरी आणि संजय गावडे यांनी धावपळ करत त्याला ससूनला हलवले. ससूनमध्ये बालकावर तातडीने उपचार सुरू केले.
ससूनच्या बालरोगशास्त्र विभागाच्या प्रमुख डॉ. आरती किणीकर यांच्या मार्गदर्शनाखाली बालराेग विभागातील डाॅ. शलाका पाटील, डॉ. गोकुळ पावसकर, डाॅ. नरेश सोनकवडे व इतर डाॅक्टरांनी ससून रुग्णालयात मुलांच्या अतिदक्षता विभागात उपचार केले.
कीटकनाशक ठेवताना काळजी घ्या
कीटकनाशक, झुरळ अथवा उंदीर मारण्याची औषधे किंवा शीतपेयाची बाटली ही बहुतेक वेळा खाद्यपदार्थाच्या खोक्यात ठेवले जाते. त्यामुळे ही बाब घातक ठरू शकते. लहान मुले खाद्यपदार्थ म्हणून त्याचे सेवन करू शकतात. त्यामुळे अशी घातक रसायने अथवा वस्तु दक्षता घेऊन ठेवाव्यात. मुलांच्या हाताला येणार नाहीत, अशा पद्धतीने ही रसायने कुलूपबंद ठेवली पाहिजेत.
कीटकनाशक अत्यंत घातक : डॉ. शलाका पाटील
अरविंदने ‘ऑर्गेनोफॉस्फरस’ या प्रकारच्या कीटकनाशकाचे सेवन केले होते. हे कीटकनाशक अत्यंत घातक असते. त्याला रुग्णालयात आणले तेव्हा तो बेशुद्ध होता. सुरुवातीला त्याच्या पोटातील कीटकनाशकाची मात्रा काढली. त्यानंतर त्याच्या छातीतील पाणी नळीद्वारे काढले. त्यासाठी काही दिवस बालक व्हेंटिलेटरवर होते. बाळाने स्वत:हून श्वास घेणे सुरू केल्यानंतर व्हेंटिलेटर काढून टाकले. आता ताे सुखरूप आहे.
– डॉ. शलाका पाटील, बालराेग विभाग, ससून रुग्णालय
