प्रतिनिधी अमित मुंडीक
Pune News : दि. ०१ जानेवारी २०२६ रोजी जयस्तंभ, पेरणे फाटा, ता. हवेली, जि. पुणे येथे होणाऱ्या अभिवादन सोहळ्यानिमित्त पुणे शहर पोलिसांकडून कडेकोट बंदोबस्त व प्रतिबंधात्मक आदेश लागू करण्यात आले आहेत. दरवर्षीप्रमाणे या सोहळ्यासाठी देशभरातून लाखो नागरिक उपस्थित राहत असल्याने कोणताही कायदा व सुव्यवस्थेचा प्रश्न निर्माण होऊ नये, यासाठी पोलीस प्रशासनाने जय्यत तयारी केली आहे.
या बंदोबस्तात वरिष्ठ पोलीस अधिकारी, पोलीस अंमलदार, होमगार्ड, एसआरपीएफच्या कंपन्या, बीडीडीएस पथके, क्यूआरटी तसेच स्ट्रायकिंग फोर्स तैनात करण्यात आली आहे. संपूर्ण जयस्तंभ परिसर सीसीटीव्ही कॅमेऱ्यांच्या निगराणीखाली असून मोबाईल सर्व्हेलन्स वाहनांच्या माध्यमातूनही चित्रीकरण केले जाणार आहे.
वाहतूक सुरळीत राहावी यासाठी वाहनतळांची योग्य व्यवस्था करण्यात आली असून पार्किंग स्थळांपासून जयस्तंभापर्यंत मोफत बससेवा उपलब्ध करून देण्यात आली आहे. तसेच गर्दीच्या ठिकाणी पोलीस मदत केंद्रे व वॉच टॉवर्स उभारण्यात आले आहेत.
कार्यक्रम शांततेत पार पडावा यासाठी अफवा, जातीय तेढ निर्माण करणारे बॅनर, फटाके, अग्निबाण, बीम लाईट, लाऊडस्पीकर व रॅली संदर्भात विविध कायद्यांन्वये प्रतिबंधात्मक आदेश लागू करण्यात आले असून, आदेशांचे उल्लंघन करणाऱ्यांवर कठोर कायदेशीर कारवाई करण्यात येणार असल्याचे पोलिसांकडून स्पष्ट करण्यात आले आहे.
