पुणे: पुण्यातील जुने वाडे आणि इमारती (Pune News) पाडताना पर्यावरण (Pune Construction) आणि नागरिकांच्या सुरक्षिततेसाठी आता स्वतंत्र नियमावली तयार करण्यात आली आहे. महापालिका आयुक्त नवल किशोर राम यांनी या नियमावलीला मंजुरी दिली असून, तिची अंमलबजावणी तातडीने सुरू करण्यात येणार आहे. या नियमांनुसार, पाडकामाच्या वेळी धूळ, आवाज आणि प्रदूषण यामुळे नागरिकांना त्रास होऊ नये, तसेच अपघात होण्याची शक्यता टाळावी, असा स्पष्ट निर्देश देण्यात आला आहे.
पुणे शहरातील मध्यवर्ती पेठांमधील अनेक जुने वाडे आणि उपनगरांतील जुन्या इमारती आता नव्या बांधकामांसाठी पाडल्या जात आहेत. मात्र, या प्रक्रियेसाठी आजवर कोणतीही ठोस नियमावली नव्हती. त्यामुळे पर्यावरण प्रदूषण, सुरक्षिततेचा अभाव आणि मनमानी पाडकाम यांसारख्या समस्या वाढल्या होत्या. या पार्श्वभूमीवर महाराष्ट्र नवनिर्माण सेनेचे राज्य सरचिटणीस हेमंत संभूस यांनी काही महिन्यांपूर्वी महापालिका आयुक्त नवल किशोर राम यांची भेट घेऊन अशा नियमावलीची मागणी केली होती.
महापालिकेच्या बांधकाम विभागाने तयार केलेल्या नव्या मार्गदर्शक सूचनांनुसार, इमारत पाडण्यापूर्वी संबंधित विकासकाने त्या ठिकाणी सुरक्षारक्षक नेमणे बंधनकारक आहे. पाडकाम करताना धूळ उडून प्रदूषण होऊ नये म्हणून जागेवर पाणी मारणे किंवा स्प्रिंकलर प्रणाली सुरू ठेवणे आवश्यक आहे. तसेच, पाडकामाच्या वेळी परिसरातील इतर इमारतींना धोका असेल, तर तेथील रहिवाशांना तात्पुरत्या ठिकाणी हलवावे.
इमारतीभोवती किमान 25 फूट उंचीचे लोखंडी पत्रे बसविणे, पोलिस ठाणे, अग्निशमन दल आणि शेजारच्या सोसायट्यांना लेखी स्वरूपात माहिती देणे हे नियम देखील बंधनकारक करण्यात आले आहेत. पाडकामानंतर निर्माण झालेला राडारोडा सुरक्षित स्थळी हलवताना त्यावर हिरव्या कापडाचे आच्छादन असणे आवश्यक आहे. तसेच, पाडकामाचे फोटो महापालिकेकडे सादर करणे आणि संबंधित स्ट्रक्चरल इंजिनिअरकडून काम पूर्ण झाल्याचा अहवाल देणेही बंधनकारक आहे.
मनसेचे हेमंत संभूस यांनी सांगितले की, आतापर्यंत जुन्या इमारती पाडण्याच्या कामात स्थानिक गुंड आणि राजकीय हस्तक्षेपामुळे ‘माफियाराज’ निर्माण झाला होता. मात्र, आता महापालिकेच्या नव्या नियमावलीमुळे या प्रकारांवर आळा बसेल. त्यांनी आयुक्त नवल किशोर राम यांनी या नियमांची अंमलबजावणी काटेकोरपणे होत आहे का, यावर स्वतः लक्ष ठेवावे, अशी मागणीही केली आहे.
