प्रतिनिधी अमित मुंडीक
Pune News : एम.आय.टी. वर्ल्ड पीस युनिव्हर्सिटी, कोथरूड, पुणे येथे महाराष्ट्र पोलीस स्थापना दिन २०२६ उत्साहात साजरा करण्यात आला. दि. ०८ जानेवारी २०२६ रोजी सकाळी ११ ते १ या वेळेत झालेल्या या कार्यक्रमास प्रमुख पाहुणे म्हणून पोलीस आयुक्त, पुणे शहर अमितेश कुमार उपस्थित होते. या कार्यक्रमात प्रत्यक्ष उपस्थित १,००० विद्यार्थ्यांसह ऑनलाईन माध्यमातून ९८१ शाळा व महाविद्यालये Zoom लिंकद्वारे जोडली गेली असून सुमारे ५ लाख विद्यार्थ्यांना पोलीस आयुक्तांचे मार्गदर्शन लाभले.
या कार्यक्रमानिमित्त पुणे पोलिसांकडून पोलीस दलाच्या कार्यपद्धतीची माहिती देणारे विविध स्टॉल व प्रात्यक्षिकांचे आयोजन करण्यात आले होते. यामध्ये शस्त्र प्रदर्शन, बॉम्ब शोध व नाशक पथक (BDDS), डॉग स्क्वॉड, पोलीस बॅण्ड, ट्रॅफिक जनजागृती, दामिनी पथक, जलद प्रतिसाद पथक (QRT), सायबर सेल स्टॉल व मोबाईल सर्व्हेलन्स व्हॅन यांचा समावेश होता. विद्यार्थ्यांनी या प्रदर्शनास मोठ्या उत्साहाने प्रतिसाद दिला.
यावेळी मा. पोलीस आयुक्त अमितेश कुमार यांनी महिला सुरक्षा, सायबर गुन्हे, अंमली पदार्थांविरोधातील जनजागृती, वाहतूक सुरक्षा तसेच दृश्य पोलीसींगमध्ये नागरिकांच्या सहभागाचे महत्त्व अधोरेखित केले. तसेच Pune Traffic Police App डाऊनलोड करण्याचे आवाहन केले. शहर सुरक्षेसाठी पोलीस-नागरिक भागीदारी आवश्यक असून युवक हे देशाचे भविष्य असल्याने त्यांनी व्यसनांपासून दूर राहावे, असा संदेश दिला. कार्यक्रमात अपर पोलीस आयुक्त पंकज देशमुख, पोलीस उप-आयुक्त (गुन्हे) निखिल पिंगळे, सह पोलीस आयुक्त रंजनकुमार शर्मा यांनीही विद्यार्थ्यांना मार्गदर्शन केले. कार्यक्रमाचे आयोजन पुणे पोलिसांच्या गुन्हे शाखेने केले.
