पुणे: पुणे जिल्ह्यातील खडकवासला, पानशेत, वरसगाव (Pune News) आणि पवना धरणांच्या पाणलोट क्षेत्रात (Illegal Construction Pune) गेल्या अनेक वर्षांपासून मोठ्या प्रमाणात अतिक्रमण आणि बेकायदेशीर बांधकामे झाली आहेत. या बांधकामांमध्ये खासगी रिसॉर्ट, फार्महाऊस, दारूभट्ट्या आणि अनेक अनधिकृत संरचना उभारण्यात आल्या होत्या. नागरिकांनी अनेक वेळा तक्रारी करूनही कारवाई होत नव्हती. मात्र आता जिल्हा प्रशासन आणि जलसंपदा विभागाने संयुक्तपणे मोठी मोहीम राबवत अतिक्रमण हटविण्याची प्रक्रिया सुरू केली आहे.
या कारवाईत खडकवासला धरण परिसरातील एका बड्या नेत्याच्या नातेवाईकाने उभारलेलं रिसॉर्ट जमीनदोस्त करण्यात आलं. त्याच्या मालकीची फक्त 12 गुंठे जमीन असताना त्याने सुमारे 32 गुंठे क्षेत्रावर बांधकाम केल्याचं समोर आलं होतं. या 20 गुंठे अतिक्रमणावर जलसंपदा विभागाने कोणत्याही राजकीय दबावाला न जुमानता थेट कारवाई केली आणि पूर्ण बांधकाम जमीनदोस्त केलं. त्यासोबतच परिसरातील जुन्या, सुमारे 30 वर्षांपासून अस्तित्वात असलेल्या दारूभट्ट्याही हटविण्यात आल्या.
पुणे जिल्हाधिकारी जितेंद्र डुडी यांनी दिलेल्या माहितीनुसार, धरणांच्या पाणलोट क्षेत्रातील सुमारे 300 अतिक्रमणे हटविण्यात आली आहेत. खडकवासला परिसरातील सुमारे 100 अतिक्रमणांवर, पानशेतमधील 30, पवनातील 12 आणि वरसगाव परिसरातील 5 अतिक्रमणांवर थेट कारवाई करण्यात आली. तसेच हिंगणे, स्वारगेट, वडगाव बुद्रुक, हडपसर आणि नीराच्या उजव्या कालव्याजवळील अतिक्रमणेही काढण्यात आली आहेत.
राज्याच्या पावसाळी अधिवेशनात या प्रश्नाची दखल घेतल्यानंतर जलसंपदा मंत्री राधाकृष्ण विखे पाटील यांनी कारवाईचे आश्वासन दिले होते. त्यानुसार आता मोहीम सुरू असून पुढील काही दिवस ही कारवाई सुरू राहणार असल्याचं प्रशासनाने स्पष्ट केलं आहे.
