पुणे : विद्येचं माहेरघर म्हणून ओळखल्या जाणाऱ्या पुण्यात (Pune News) मंगळवारी घडलेल्या एका घटनेने खळबळ उडाली आहे. एका तरुणीला भररस्त्यात अत्यंत क्रूरपणे लाथा-बुक्क्यांनी मारहाण केल्याचा प्रकार समोर आलाय. या घटनेचा एक व्हिडिओ देखील सध्या सोशल मीडियावर तुफान व्हायरल होत आहे. नवरात्र उत्सवाच्या काळात एकीकडे सर्वत्र देवीचा जागर आणि कर्तृत्ववान महिलांचा सन्मान केला जातो. तर दुसरीकडे ही घटना समोर आल्याने नागरिकांमधून संताप व्यक्त केला जात आहे.
नेमकी घटना काय?
मिळालेल्या माहितीनुसार, ही घटना मंगळवारी रात्री 8 वाजण्याच्या सुमारास पुणे-सातारा रस्त्यावरील के-के मार्केट ते चव्हाण नगर मार्गादरम्यान घडली. ही घटना या रस्त्यावरील सीसीटीव्ही कॅमेरात कैद झाली असून, या व्हिडिओमध्ये दिसत आहे की, एक तरुण रस्त्यावर एका तरुणीला बेदम मारत आहे. सुरुवातील दोघेजण वाद घालत आहेत. नंतर संतापलेला तरुण तरुणीच्या कानशिलात मारून तिला लाथा बुक्क्यांनी मारहाण करताना दिसत आहे.
या व्हिडिओमधील एक खेदजनक भाग म्हणजे तरुणीला मारहाण सुरू असताना आजूबाजूला मोठी गर्दी जमली होती. मात्र, जमावाने तरुणाला थांबवण्याऐवजी केवळ बघ्याची भूमिका घेतली. व्हिडिओ व्हायरल झाल्यानंतर अनेक नागरिकांनी बघ्याची भूमिका घेणाऱ्यांवर तीव्र संताप व्यक्त केला आहे.
दरम्यान, ही मारहाण नेमकी कोणत्या कारणामुळे झाली, तसेच मारहाण करणारा तरुण आणि तरुणी यांचे नेमके संबंध काय आहेत, याबाबत कोणतीही अधिकृत माहिती अद्याप मिळालेली नाही. सहकारनगर पोलिस ठाण्याचे वरिष्ठ पोलिस निरीक्षक विठ्ठल पवार यांनी दिलेल्या माहितीनुसार, रात्री उशिरापर्यंत या घटनेबाबत कोणतीही तक्रार दाखल झालेली नव्हती.
या घटनेची कोणतीही तक्रार दाखल झालेली नसली तरी देखील रस्त्यावर अशाप्रकरने मुलींना मारहाण होत असेल तर ही अत्यंत संतापजनक घटना आहे.
