पुणे: पुण्यातून (Pune) एक धक्कादायक घटना समोर आली आहे. बाणेर येथील एका 17 वर्षीय विद्यार्थिनीने ऑनलाइन गेमिंगच्या माध्यमातून झालेल्या ‘मैत्री’च्या नादात 2,100 किलोमीटरचा प्रवास करून थेट पश्चिम बंगाल गाठले. मात्र, तिच्यासोबत विश्वासघात झाला आणि आरोपीने तिच्या बलात्कार केल्याचे समोर आले आहे.
पीडित मुलगी 18 जुलै रोजी बेपत्ता झाल्याची तक्रार तिच्या काकांनी चतुश्रृंगी पोलिस ठाण्यात दाखल केली होती. सात दिवसांच्या अथक प्रयत्नांनंतर पोलिसांनी तिला पश्चिम बंगालच्या नागरकाटा, जलपाईगुडी गावातून सुखरूप (Online Safety) परत आणले. मात्र, तिच्या जबाबानंतर पोलिसांना कळले कि, केवळ अपहरणाचाच नव्हे, तर लैंगिक अत्याचार झाल्याचेही समोर आले आहे. पोलिसांच्या म्हणण्यानुसार, पीडित मुलीचा संपर्क आरोपीशी ऑनलाइन गेमिंग प्लॅटफॉर्मवर झाला होता.
हळूहळू त्यांनी मोबाईल क्रमांकांची देवाणघेवाण केली आणि मेसेजिंग ॲप्सवर गप्पा सुरू केल्या. विश्वास वाढल्यावर त्यांनी फोनवर बोलणे सुरू केले. याच विश्वासाचा गैरफायदा घेत आरोपीने तिला गावाला येण्यास प्रवृत्त केले. गावात पोहोचल्यावर आरोपीने तिच्यावर लैंगिक अत्याचार केले. दरम्यान, 30 वर्षीय आरोपी विरुद्ध POCSO अंतर्गत गुन्हा दाखल करण्यात आला असून, तो सध्या न्यायालयीन कोठडीत आहे.
