Pune Electric Buses: पुणे : सार्वजनिक वाहतुकीच्या क्षेत्रात मोठा बदल घडवत पुणे शहराने सीएनजी (CNG) आणि इलेक्ट्रिक बसच्या माध्यमातून एक सकारात्मक उदाहरण निर्माण केले आहे. पुणे महानगर परिवहन महामंडळ लिमिटेड म्हणजेच पीएमपीएमएलने कमी दरात सुरक्षित आणि सोयीस्कर प्रवासाची सुविधा उपलब्ध करून दिल्यामुळे सर्वसामान्य नागरिकांना मोठा दिलासा मिळाला आहे. अवघ्या 5, 10 आणि 20 रुपयांत प्रवास करता येत असल्याने नोकरी, व्यवसाय आणि शिक्षणासाठी रोज प्रवास करणाऱ्या नागरिकांचा खर्च लक्षणीयरीत्या कमी झाला आहे. Electric Bus
हेही वाचा- सावंतवाडी ते खामगाव… महायुती सुसाट! नगरपरिषद निवडणुकीत भाजप नंबर १; वाचा सर्व विजयी उमेदवारांची नावे
सध्या पुण्यातील जवळपास 10 लाख नागरिक दररोज पीएमपीएमएलच्या बससेवेचा वापर करतात. नव्या, आधुनिक आणि वातानुकूलित बसमुळे प्रवास अधिक आरामदायी झाला आहे. बसची संख्या वाढवण्यात आल्याने पूर्वीची गर्दी कमी झाली असून फेऱ्यांची संख्या देखील वाढली आहे. त्यामुळे वेळेवर बस मिळणे शक्य झाले आहे.
कष्टकरी, नोकरदार, महिला, विद्यार्थी आणि मध्यमवर्गीय नागरिकांचा विचार करून पीएमपीएमएलने ‘अटल बससेवा’ आणि ‘पुण्यदशम’ या विशेष सेवा सुरू केल्या आहेत. अटल बससेवेमुळे केवळ 5 रुपयांत 5 किलोमीटरचा प्रवास करता येतो, तर पुण्यदशम सेवेत 10 रुपयांत प्रवासाची सुविधा दिली जाते. स्वारगेट, डेक्कन, शिवाजीनगर, पुणे स्टेशन, महात्मा गांधी बस स्थानक यासह मध्य पुण्यातील 9 मार्गांवर पुण्यदशम बस धावत आहेत.
सध्या पीएमपीएमएलच्या ताफ्यात सुमारे 2000 बस आहेत. यामध्ये 1328 सीएनजी, 490 इलेक्ट्रिक आणि 217 डिझेल बसचा समावेश आहे. डिसेंबर 2025 पर्यंत डिझेल बस पूर्णपणे बंद करण्याचे धोरण असल्यामुळे शहरातील वायू प्रदूषणात मोठी घट होण्याची अपेक्षा आहे.
मुख्यमंत्री देवेंद्र फडणवीस यांच्या पाठपुराव्यामुळे केंद्र सरकारने पुण्यासाठी आणखी 2000 पर्यावरणपूरक बस मंजूर केल्या आहेत. यात 1000 सीएनजी आणि 1000 इलेक्ट्रिक बसचा समावेश आहे. या निर्णयांमुळे पुणेकरांना अधिक सक्षम, स्वस्त आणि पर्यावरणपूरक सार्वजनिक वाहतूक उपलब्ध होणार असून पीएमपीएमएलच्या या बदलांना नागरिकांकडून चांगला प्रतिसाद मिळत आहे.
