लोणी काळभोर, (पुणे) : साप पकडत असताना थेऊर (ता. हवेली) येथील एका 21 वर्षीय तरुण सर्पमित्राचा साप चावून मृत्यू झाल्याची घटना नुकतीच उघडकीस आली आहे. कोलवडी (ता. हवेली) ग्रामपंचायत हद्दीत सोमवारी (ता. 25) सायंकाळी ही घटना घडली.
दिपक संतोष जाधव (वय 21, गोरक्षक/सर्पमित्र, रा. सिद्धेश्वर मंदिर रोड, काळे वस्ती, थेऊर. ता. हवेली) असे मृत पावलेल्या धाडसी तरुण सर्पमित्राचे नाव असून, त्याच्या या अकाली निधनामुळे थेऊरसह परिसरावर शोककळा पसरली आहे.
मिळालेल्या माहितीनुसार, दिपक जाधव हे मागील अनेक दिवसांपासून विनामोबदला साप पकडत होते. हा अत्यंत मनमिळावू आणि धाडसी तरुण होता. परिसरात तो एक सक्रिय गोरक्षक आणि सर्पमित्र म्हणून ओळखला जात होता. कुठेही कोणाच्या घरात किंवा शेतात साप निघाल्यास नागरिक दीपकला फोन करत असत आणि तो देखील जीवाची पर्वा न करता तातडीने तिथे पोहोचून सापांना सुखरूप पकडून निसर्गाच्या सानिध्यात मुक्त करत असे.
सोमवारी सायंकाळच्या सुमारास कोलवडी गावच्या हद्दीत एका ठिकाणी साप निघाल्याची माहिती दीपकला मिळाली होती. त्यानुसार तो नेहमीप्रमाणे सापाला जीवदान देण्यासाठी तिथे पोहोचला. शोधमोहीम सुरू असताना, एका ठिकाणी पडलेल्या पत्र्यांच्या ढिगाऱ्याखाली साप लपल्याचा त्याला संशय आला. दीपकने पत्र्याच्या खाली हात घातला असता यावेळी पत्र्याखाली दबा धरून बसलेल्या सापाने दीपकच्या हाताला दंश केला.
दरम्यान, सापाने दंश केल्याचे लक्षात येताच नागरिकांनी आणि मित्रांनी दीपकला तात्काळ उपचारासाठी पुण्याच्या ससून रुग्णालयात हलवले. मात्र रुग्णालयातील डॉक्टरांनी उपचारापूर्वीच त्यांचा मृत्यू झाल्याची माहिती दिली. दीपकच्या पश्चात त्याचा मोठा मित्रपरिवार असून, सर्व स्तरांतून त्याला भावपूर्ण श्रद्धांजली वाहिली जात आहे.
