बारामती: शासकीय नोकरीचे खोटे आमिष दाखवून सुशिक्षित तरुण-तरुणींची कोट्यवधी रुपयांची फसवणूक करणाऱ्या एका टोळीचा बारामती तालुका पोलिसांनी पर्दाफाश केला आहे. बनावट नियुक्तीपत्रे देऊन उमेदवारांना तब्बल 1 कोटी 36 लाख 90 हजार रुपयांचा गंडा घालणाऱ्या टोळीतील प्रमुख आरोपी सूरज तिमय्या असदकर (वय 39 वर्षे, व्यवसाय- डिलिव्हरी बॉय, रा. पडवळ आळी, गोखले हॉल जवळ, चिंचवड गाव, ता. हवेली, जि. पुणे) याला पोलिसांनी अटक केली आहे. या धडक कारवाईमुळे बनावट नोकरीचे रॅकेट चालवणाऱ्यांचे धाबे दणाणले आहेत.
मिळालेल्या माहितीनुसार, हा फसवणुकीचा प्रकार सन 2023 ते 4 मे 2025 या कालावधीत बारामतीमधील तांदुळवाडी येथील महिला रुग्णालय आणि मळद परिसरात घडला. मुख्य आरोपी अनिकेत पाठक याने शासकीय रुग्णालयात ‘गट-क अधिपरिचारिका’ पदावर नोकरी लावून देण्याचे खोटे आमिष दाखवले होते. यानंतर त्याने त्याचे साथीदार अजिंक्य पाठक, सिओना साळवे, सुधाकर सोळंकी, सागर गायकवाड आणि सुरज असदकर यांच्या मदतीने अनेक उमेदवारांकडून ऑनलाइन आणि रोख स्वरूपात कोट्यवधी रुपये उकळले. उमेदवारांचा विश्वास संपादन करण्यासाठी या टोळीने त्यांना चक्क बनावट शासकीय नियुक्तीपत्रे देखील दिली होती.
नोकरी लागत नसल्याचे समोर आल्यानंतर फसवणूक झालेल्या उमेदवारांनी पोलिसांत धाव घेतली. या प्रकरणी मार्च 2026 मध्ये बारामती तालुका पोलीस ठाण्यात गुन्हा दाखल करण्यात आला होता. या टोळीतील आरोपी सुरज असदकर हा चिंचवडगाव येथे त्याच्या घरी येणार असल्याची गुप्त माहिती पोलिसांना मिळाली. त्यानुसार पोलिसांनी तातडीने सापळा रचून त्याला अटक केली. चौकशीदरम्यान त्याने पैशांच्या हव्यासापोटी हा गुन्हा केल्याची कबुली दिली असून न्यायालयाने त्याला 6 दिवसांची पोलीस कोठडी सुनावली आहे. या गुन्ह्यात यापूर्वीच दौंड येथील अजिंक्य पाठक आणि येरवड्यातील सुधाकर सोळंकी यांना अटक करण्यात आली आहे.
पुणे ग्रामीणचे पोलीस अधीक्षक संदीपसिंह गिल, अप्पर पोलीस अधीक्षक गणेश बिरादार आणि उपविभागीय पोलीस अधिकारी सुदर्शन राठोड यांच्या मार्गदर्शनाखाली ही यशस्वी कामगिरी करण्यात आली. या कारवाईत पोलीस निरीक्षक चंद्रशेखर यादव, सहाय्यक पोलीस निरीक्षक विक्रम पवार यांच्यासह पोलीस अंमलदार सागर देशमाने, जितेंद्र शिंदे आणि विठ्ठल तरंगे यांनी कारवाई केली. या रॅकेटमधील इतर संशयितांचा शोध घेण्यासाठी पोलीस सध्या पुढील तपास करत आहेत.
