शिरूर: शिरूर तालुक्यात शनिवारी(ता.07)पार पडलेल्या 7 जिल्हा परिषद गट व 14 पंचायत समिती गणांच्या निवडणुकीत मतदारांनी उत्स्फूर्त सहभाग नोंदवत सरासरी 75.59 टक्के मतदान झाले. तालुक्यातील एकूण 2 लाख 28 हजार 119 मतदारांनी आपला मतदानाचा हक्क बजावला असून,यामध्ये 1 लाख 18 हजार 685 पुरुष तर 1 लाख 9 हजार 422 महिला मतदारांसह इतर 6 जणांचा समावेश आहे.
यंदाच्या निवडणुकीत कवठे येमाई–टाकळी हाजी,रांजणगाव गणपती–कारेगाव आणि तळेगाव ढमढेरे–रांजणगाव सांडस या जिल्हा परिषद गटांमध्ये तालुक्याच्या सरासरीपेक्षा अधिक मतदानाची नोंद झाली आहे.मतदानाच्या आदल्या रात्री झालेले लक्ष्मी दर्शन,भेटवस्तूंचे वाटप, तसेच निवडणुकीच्या अगोदर मतदारांना घडवलेले देवदर्शन यांचा परिणाम या गटांतील वाढलेल्या मतदानावर झाल्याची चर्चा राजकीय वर्तुळात रंगली आहे.वाढलेली मतदानाची टक्केवारी नेमकी कोणासाठी पोषक आणि कोणासाठी घातक ठरणार,याचा फैसला सोमवारी (ता.09)होणाऱ्या मतमोजणीतूनच स्पष्ट होणार आहे.त्यामुळे मोठ्या प्रमाणावर खर्च करूनही अनेक उमेदवार विजयाबाबत साशंक असल्याचे चित्र तालुक्यात दिसून येत आहे.
यंदाची निवडणूक अनेक कारणांनी गाजली.तालुक्यातील प्रमुख राजकीय पुढाऱ्यांसह अनेक उमेदवारांनी कपडे बदलावेत तशी पक्षांतरं केली.यामुळे अनेकांची राजकीय निष्ठा व प्रतिष्ठा प्रश्नचिन्हाखाली आली असून,त्याचा परिणाम अनेक ठिकाणी क्रॉस व्होटिंगच्या स्वरूपात दिसून आल्याची चर्चा आहे.
गटनिहाय मतदानाचा आढावा खालील प्रमाणे :
कवठे येमाई–टाकळी हाजी जिल्हा परिषद गट
टाकळी हाजी पंचायत समिती गण : 16735मतदान (80.74%)
कवठे येमाई पंचायत समिती गण : 16688 मतदान (85.99%)
न्हावरे–शिरूर ग्रामीण जिल्हा परिषद गट
शिरूर ग्रामीण पंचायत समिती गण : 17107 मतदान (72.69%)
न्हावरे पंचायत समिती गण : 14781 मतदान (सुमारे 75%)
रांजणगाव गणपती–कारेगाव जिल्हा परिषद गट
रांजणगाव गणपती पंचायत समिती गण : 16870 मतदान (81.37%)
कारेगाव पंचायत समिती गण : 16363 मतदान (80.25%)
पाबळ–केंदूर जिल्हा परिषद गट
पाबळ पंचायत समिती गण : 16962 मतदान (72.83%)
केंदूर पंचायत समिती गण : 17951 मतदान (76.94%)
शिक्रापूर–सणसवाडी जिल्हा परिषद गट
शिक्रापूर पंचायत समिती गण : 14950मतदान (70.66%)
सणसवाडी पंचायत समिती गण : 14045 मतदान (71.70%)
तळेगाव ढमढेरे–रांजणगाव सांडस जिल्हा परिषद गट
तळेगाव ढमढेरे पंचायत समिती गण : 17475मतदान (75.71%)
रांजणगाव सांडस पंचायत समिती गण :16708मतदान (81.12%)
वडगाव रासाई–मांडवगण फराटा जिल्हा परिषद गट
वडगाव रासाई पंचायत समिती गण : 16051मतदान (72.13%)
मांडवगण फराटा पंचायत समिती गण : 15427 मतदान (71.97%)
एकूणच, शिरूर तालुक्यातील ही निवडणूक उच्च मतदान,राजकीय उलथापालथ आणि अनिश्चित निकाल यामुळे लक्षवेधी ठरली आहे.आता सर्वांचे लक्ष सोमवारी (ता.09) होणाऱ्या मतमोजणीकडे लागले असून,वाढलेल्या मतदानाचा राजकीय गणितावर नेमका कसा परिणाम होतो,हे पाहणे औत्सुक्याचे ठरणार आहे.तालुक्यातील सर्वत्र किरकोळ अपवाद वगळता शांततेत मतदार पार पडले.तसेच मतमोजणी सोमवारी(ता.09)सकाळी 8 वाजल्यापासून रांजणगाव गणपती एमआयडीसी येथील राज्य वखार महामंडळाच्या गोडाऊन नंबर 2 येथे पार पडणार आहे.
