पुणे: पुणे जिल्ह्यातील शिरूर (Shirur News) परिसरात पाच वर्षांपूर्वी (Pune News) घडलेल्या एका घटनेत पीडितेला अखेर न्याय मिळाला आहे. एका अल्पवयीन मुलीचे (Pune Crime) अपहरण करून तिच्यावर अत्याचार करणाऱ्या नराधमाला पुणे सत्र न्यायालयाने शुक्रवारी कठोर शिक्षा सुनावली. शिवाजीनगर येथील जिल्हा व सत्र न्यायालयाने या प्रकरणातील आरोपीला २० वर्षे सक्तमजुरीची शिक्षा देऊन कोठडीत धाडले आहे.
ही घटना २०२० मध्ये घडली. चंद्रशेखर दीपक वनशिव (वय ३२, राहणार पारगाव, ता. दौंड) असे शिक्षा झालेल्या आरोपीचे नाव आहे. या नराधमाने एका लहान मुलीला फूस लावून तिचे अपहरण केले होते आणि त्यानंतर तिच्यावर अत्याचार केले होते. शिरूर पोलिसांनी तातडीने तपास करून या आरोपीला बेड्या ठोकल्या होत्या आणि तेव्हापासून हा खटला न्यायालयात सुरू होता.
प्रमुख जिल्हा व सत्र न्यायाधीश महेंद्र महाजन यांच्या समोर या प्रकरणाची अंतिम सुनावणी पार पडली. पोलिसांनी गोळा केलेले पुरावे आणि साक्षीदारांच्या जबाबावरून आरोपीने केलेला गुन्हा सिद्ध झाला. न्यायालयाने आरोपीला पोक्सो कायद्याच्या विविध कलमांखाली २० वर्षे सक्तमजुरी आणि १०,००० रुपये दंडाची शिक्षा सुनावली आहे. याव्यतिरिक्त मुलीचे अपहरण केल्याबद्दल ५ आणि ७ वर्षांच्या वेगवेगळ्या कारावासाची शिक्षाही देण्यात आली आहे.
या प्रकरणाचा तपास पोलीस अधिकारी बी. एन. काबुगडे यांनी केला होता. शिरूर पोलीस स्टेशनचे वरिष्ठ निरीक्षक संदेश केंजळे आणि त्यांच्या सहकाऱ्यांनी या खटल्याचा सतत पाठपुरावा केला, ज्यामुळे आरोपीला सुटण्याची कोणतीही संधी मिळाली नाही. पाच वर्षांच्या प्रदीर्घ प्रतिक्षेनंतर मिळालेल्या या निकालामुळे पीडित कुटुंबाला मोठा दिलासा मिळाला आहे.
