पुणे: पिंपरी चिंचवड (Shaurya Din) शहराच्या वाहतूक विभागाने 1 जानेवारी रोजी होणाऱ्या भीमा कोरेगाव शौर्य दिन सोहळ्यासाठी प्रवासाचे नवीन नियम जाहीर केले आहेत. पोलीस उपायुक्त विवेक पाटील यांनी दिलेल्या माहितीनुसार, हा बदल 31 डिसेंबर रोजी सकाळी 10 वाजता सुरू होईल आणि 1 जानेवारी रोजी रात्री 12 वाजेपर्यंत कायम असेल. विजयस्तंभाला अभिवादन करण्यासाठी येणाऱ्या लाखो अनुयायांच्या सोयीसाठी चाकण, शिक्रापूर आणि आळंदी भागातील काही महत्त्वाचे रस्ते खाजगी गाड्यांसाठी बंद करण्यात आले आहेत.
प्रशासनाने प्रवासासाठी पर्यायी व्यवस्था केली असून मुंबईकडून अहिल्यानगरकडे जाणारी मोठी वाहने आता तळेगाव ऐवजी वडगाव मावळ, खेड आणि नारायणगाव मार्गे जातील. चाकण ते शिक्रापूर या मार्गावर फक्त अनुयायांच्या बसेसना जाण्याची परवानगी असेल, तर इतर सर्व खाजगी वाहनांना या रस्त्यावर प्रवेश दिला जाणार नाही. मोशी चौक आणि पांजरपोळ परिसरातून अवजड वाहने नेण्यास पूर्णपणे बंदी असेल, मात्र रुग्णवाहिका आणि इतर आपत्कालीन सेवांना यातून वगळण्यात आले आहे.
नाशिककडून येणाऱ्या प्रवाशांच्या गाड्या चाकण मार्गे शिक्रापूरला जातील आणि मुंबईकडून जुन्या हायवेने येणाऱ्या बसेस म्हाळुंगे व चाकण मार्गे नेल्या जातील. हलक्या वाहनांसाठी मरकळ आणि तुळापूर मार्गे लोणीकंदकडे जाण्याची सोय केली आहे. मरकळ येथील पुलावर 8 फूट उंचीचे बॅरिकेड्स लावल्यामुळे त्यापेक्षा मोठ्या गाड्यांना तिथून जाता येणार नाही. पुणे शहरातून आळंदीकडे जाणाऱ्या गाड्यांनाही या काळात वाघोली मार्गे वळवण्यात आले आहे.
लोणीकंद भागात जाणाऱ्या लोकांनी तापकीर चौक किंवा चोली फाटा या पर्यायी रस्त्यांचा वापर करावा असे आवाहन पोलिसांनी केले आहे. एमआयडीसी भागातील जड वाहनांना सुद्धा ठराविक मार्गावर जाण्यास मनाई करण्यात आली आहे. वाहतूक कोंडी टाळण्यासाठी आणि लोकांचा प्रवास सुखाचा व्हावा यासाठी पोलिसांनी हे नियोजन केले आहे. प्रवाशांनी या बदलांची नोंद घेऊन पोलीस प्रशासनाला मदत करावी असे आवाहन करण्यात आले आहे.
