पुणे: केतन अग्रवाल खून प्रकरणाच्या तपासात पोलिसांच्या हाती आणखी काही महत्त्वाचे धागेदोरे लागले आहेत. लोणावळ्यातील लोहगड किल्ल्यावरून केतनला खोल दरीत ढकलून त्याचा खून केल्याचा आरोप आहे. या प्रकरणातील मुख्य आरोपी सिया गोयल आणि चेतन चौधरी यांच्या संबंधांबाबतही तपासातून नवी माहिती समोर आली आहे. पोलिसांनी न्यायालयात दाखल केलेल्या दोषारोपपत्रात आरोपींच्या मोबाईलमधून मिळालेल्या काही पुराव्यांचा समावेश केला आहे.
पोलिसांच्या तपासानुसार, सिया आणि चेतन यांच्यात ऑक्टोबर 2025 पासून जवळीक वाढली होती. त्यांच्या नात्याला दोन्ही कुटुंबांकडून विरोध असल्याचेही तपासात समोर आले आहे. त्यानंतर डिसेंबर 2025 मध्ये दोघे काही मित्रांसोबत राजस्थानला गेल्याची माहिती पोलिसांना मिळाली.
या प्रवासादरम्यान दोघांनी खाटूश्याम मंदिरात गुप्तपणे विवाह केला असावा, असा पोलिसांचा संशय आहे. सुरुवातीला राजस्थानला जाण्यासाठी त्यांनी विमानप्रवासाचे नियोजन केले होते. मात्र विमानसेवा रद्द झाल्यानंतर त्यांनी रेल्वेने प्रवास केल्याचे तपासात समोर आले. राजस्थानमध्ये मंदिरात दर्शन घेतल्यानंतर लग्न झाल्याचा संशय व्यक्त करण्यात आला आहे.
पोलिसांना सिया आणि चेतनचा एक फोटोही मिळाला आहे. या फोटोमध्ये सियाच्या भांगेत सिंदूर दिसत असून चेतनच्या गळ्यात फुलांचा हार असल्याचे सांगण्यात आले आहे. हा फोटो पोलिसांनी तपासातील महत्त्वाचा पुरावा म्हणून दोषारोपपत्रासोबत न्यायालयात सादर केला आहे. मात्र मंदिरात विवाह झाल्याचे प्रत्यक्ष फुटेज पोलिसांना मिळालेले नाही.
दरम्यान, 18 जून 2026 रोजी घडलेल्या हत्येच्या दिवशी आरोपींच्या हालचालींचीही पोलिसांनी माहिती गोळा केली आहे. केतनला लोहगड किल्ल्यावरून सुमारे 400 फूट खोल दरीत ढकलल्यानंतर चेतन दुचाकीवरून जुन्या पुणे-मुंबई महामार्गावरील एका हॉटेलमध्ये गेल्याचे तपासात समोर आले आहे. किल्ला आणि हॉटेल परिसरातील सीसीटीव्ही फुटेजच्या आधारे पोलिसांनी घटनाक्रम जोडण्याचा प्रयत्न सुरु आहे.
