लोणी काळभोर (पुणे) : कुंजीरवाडी (ता. हवेली) ग्रामपंचायत हद्दीत राहणाऱ्या एका ३५ वर्षीय स्कुल व्हॅन चालकाने राहत्या घरी दोरीच्या सहाय्याने गळफास घेऊन आत्महत्या केल्याची खळबळजनक घटना शनिवारी (ता. २५) सायंकाळी सात वाजण्याच्या सुमारास घडली. याप्रकरणी लोणी काळभोर पोलीस ठाण्यात आकस्मित मृत्यूची नोंद करण्यात आली आहे. आत्महत्येमागील नेमके कारण अद्याप स्पष्ट झालेले नाही.
तात्या उर्फ सतीश ज्ञानोबा मेमाणे (वय ३५, रा. विठ्ठल रुक्मिणी मंदिराच्या पाठीमागे, कुंजीरवाडी, ता. हवेली) असे आत्महत्या केलेल्या व्यक्तीचे नाव आहे. याबाबत मिळालेल्या माहितीनुसार, तात्या उर्फ सतीश मेमाणे हे एका खासगी शाळेत बसगाडीवर चालक म्हणून काम करीत होते. त्यांना दारू पिण्याचे व्यसन होते. मागील चार दिवसांपासून ते कामावर देखील गेले नव्हते, अशी प्राथमिक माहिती स्थानिक नागरिकांनी दिली.
दरम्यान, शनिवारी संध्याकाळी सात वाजण्याच्या सुमारास राहत्या घरी तात्या उर्फ सतीश यांनी गळफास घेतल्याचे निदर्शनास आले. त्यांनी कोणत्या कारणामुळे आत्महत्या केली याचे कारण अस्पष्ट आहे. लोणी काळभोर पोलीस पुढील तपास करीत आहेत.
