पुणे: माळेगाव शहरातील एका महाविद्यालयातील (Pune Shocking News) प्राध्यापकावर अल्पवयीन विद्यार्थिनींना अश्लील संदेश पाठवून छळ केल्याप्रकरणी पोक्सोसह विविध गंभीर कलमांखाली गुन्हा दाखल करण्यात आला आहे. या घटनेमुळे बारामती तालुक्यात मोठी खळबळ उडाली असून पालकवर्गात संताप आणि चिंता व्यक्त केली जात आहे. (Pune Crime)
शिक्षकी पेशाला काळिमा फासणाऱ्या प्राध्यापकाचे नाव नितीन शंकर तावरे (वय 42, रा. सांगवी, ता. बारामती) असे आहे. त्यांच्या विरोधात संदीप रमेश शहा यांनी फिर्याद दिली आहे.
फिर्यादीत नमूद केल्यानुसार, आरोपी प्राध्यापकाने डिप्लोमा इंजिनिअरिंग शाखेतील प्रथम वर्षात शिकणाऱ्या अल्पवयीन विद्यार्थिनींना त्यांच्या इच्छेविरुद्ध व्हॉट्सॲपवर अश्लील भाषेत संदेश पाठवले. संदेशांना उत्तर न दिल्यास अंतर्गत गुण (30 मार्क) कमी करण्याची धमकी दिली जात होती.
याशिवाय, वर्गात शिकवताना विद्यार्थिनींच्या जवळ जाणे, स्पर्श करण्याचा प्रयत्न करणे, बेंचवर हात ठेवून शरीराला स्पर्श होईल असे वर्तन करणे, विरोध केल्यास वर्गात टार्गेट करून अपमान करणे, अशा गंभीर स्वरूपाच्या तक्रारीही करण्यात आल्या आहेत. ही कृत्ये 22 जानेवारी ते 12 फेब्रुवारी 2026 दरम्यान घडल्याचे फिर्यादीत म्हटले आहे.
या प्रकरणाचा तपास उपनिरीक्षक देविदास साळवे करीत आहेत. पोक्सो कायद्यानुसार अल्पवयीन मुलींविरुद्ध लैंगिक स्वरूपाच्या छळाला कठोर शिक्षा आहे. आरोपीला अटक होण्याची शक्यता वर्तवली जात आहे.
शिक्षकच अशा प्रकारे गैरवर्तन करत असतील तर मुलींना शिक्षणासाठी सुरक्षित वातावरण कसे मिळणार? असा सवाल पालकांकडून उपस्थित केला जात आहे. स्थानिक पातळीवर कॉलेज प्रशासनाच्या भूमिकेवरही प्रश्नचिन्ह उपस्थित होत आहे. या घटनेमुळे शिक्षण संस्थांमधील सुरक्षिततेचा प्रश्न पुन्हा एकदा ऐरणीवर आला आहे. पुढील तपासात आणखी धक्कादायक बाबी समोर येण्याची शक्यता नाकारता येत नाही.
