पुणे: सातारा जिल्ह्यातील निंबोडी गावचा सुपुत्र आणि पुणे शहर पोलीस दलातील शिपाई विठ्ठल कारंडे यांनी आंतरराष्ट्रीय ‘आयर्न मॅन’ (Iron Man) स्पर्धेत आपला दमदार ठसा उमटवला आहे. 1 नोव्हेंबर 2025 रोजी मलेशियातील लांगकावी बेटावर पार पडलेल्या या स्पर्धेत त्यांनी केवळ 12 तास 6 मिनिटे 56 सेकंदांत तीनही टप्पे पूर्ण करून नवा विक्रम केला. हा पराक्रम साध्य करणारे विठ्ठल कारंडे हे पुणे शहर पोलीस दलातील पहिले ‘आयर्न मॅन’ ठरले आहेत. 100 हून अधिक भारतीय स्पर्धकांमध्ये त्यांनी चौथा क्रमांक पटकावला आहे.
प्रचंड कठीण स्पर्धा
2012 साली पुणे शहर पोलीस दलात भरती झाल्यानंतर कारंडे यांनी नोकरी आणि कुटुंब सांभाळत दररोज पहाटे सराव करणे सुरू ठेवले. ‘आयर्न मॅन’ स्पर्धेत सहभागी होणाऱ्या व्यक्तीला 17 तासांच्या मर्यादेत तीन अत्यंत कठीण टप्पे पार करायचे असतात. 4 कि.मी. समुद्रात पोहणे, त्यानंतर 180 कि.मी. सायकल चालवणे आणि शेवटी 42.2 कि.मी. धावणे. शेतकरी कुटुंबातील कारंडे यांनी कठोर मेहनत, वेळेचे अचूक नियोजन आणि प्रचंड जिद्दीच्या बळावर हे आव्हान सहज पूर्ण केले आहे.
नोकरी आणि सरावाचा समतोल
विठ्ठल कारंडे यांच्या प्रवासात पत्नी सौ. सुजाता कारंडे यांचा भक्कम आधार आणि प्रशिक्षक डॉ. योगेश सातव यांचे शास्त्रशुद्ध मार्गदर्शन महत्त्वाचे ठरले. कारंडे यांच्या या ऐतिहासिक यशामुळे सातारा जिल्हा, पुणे पोलीस दल आणि संपूर्ण निंबोडी गावात अभिमानाचे वातावरण आहे. त्यांचे सहकारी आणि अधिकारी वर्ग विठ्ठल कारंडे यांच्या चिकाटीची आणि जिद्दीची प्रशंसा करत आहेत.
