पुणे: पुणे (Pune News) जिल्ह्यात राज्य उत्पादन शुल्क विभागाने नवीन वर्षाच्या स्वागतापूर्वीच मोठी कारवाई करत दारू तस्करांचे धाबे दणाणले आहेत. परराज्यातून येणाऱ्या बेकायदेशीर मद्यावर नियंत्रण मिळवण्यासाठी प्रशासनाने दोन वेगवेगळ्या ठिकाणी छापे टाकले असून यामध्ये 48 लाख रुपयांचा ऐवज जप्त केला आहे. या मोहिमेत 5 आरोपींना अटक करण्यात आली असून तस्करीसाठी वापरली जाणारी वाहनेही ताब्यात घेण्यात आली आहेत. विशेष म्हणजे तस्करांनी औषधांच्या बॉक्समागे लपवून ट्रकमधून दारू नेण्याचा प्रयत्न केला होता, मात्र अधिकाऱ्यांनी त्यांचा हा डाव उधळून लावला आहे.
सासवड विभागाच्या पथकाने पुणे-सातारा महामार्गावरील सारोळा परिसरात गोव्याहून येणाऱ्या एका संशयास्पद ट्रकची झडती घेतली असता, त्यात औषधांच्या नावाखाली लपवलेला मोठा दारूसाठा सापडला. या प्रकरणात संपत लक्ष्मण गावडे नावाच्या चालकाला बेड्या ठोकण्यात आल्या असून त्याच्या घराची झडती घेतली असता तिथेही काही साठा हस्तगत झाला आहे. ही दारू महाराष्ट्रात विक्रीसाठी प्रतिबंधित असून ती छुप्या मार्गाने पुणे शहरात वितरीत केली जाणार होती.
पुणे-सोलापूर महामार्गावरील उरुळी कांचन येथे अधिकाऱ्यांनी या कारचा फिल्मी स्टाईल पाठलाग करून गोवा बनावटीच्या 138 बाटल्या जप्त केल्या. पोलिसांनी केवळ चालकालाच पकडले नाही, तर या संपूर्ण रॅकेटचा मुख्य सूत्रधार हनुमंत रोकडे आणि मद्य पुरवठादार राजू केकान यांनाही अटक केली आहे. याशिवाय आंबेगाव परिसरातून समीर राऊत यालाही पोलिसांनी ताब्यात घेतले आहे.
अतुल कानडे यांच्या मार्गदर्शनाखाली झालेल्या या दोन्ही कारवायांमध्ये ट्रक, कार आणि विदेशी मद्य असा एकूण 43 लाख 57 हजार 400 रुपयांचा मुद्देमाल जप्त झाला आहे. थर्टी फर्स्टच्या काळात पार्टीसाठी अवैध दारू पुण्यात आणली जाते होती.
