पुणे: पुणे (Pune News) शहरातील सहकारनगर भागात एका बंगल्याच्या रंगकामादरम्यान मोठी दुर्घटना घडली असून यात एका मजुराचा मृत्यू झाला आहे तर दुसरा मजूर गंभीर जखमी झाला आहे. या प्रकरणी मजुरांची सुरक्षा वाऱ्यावर सोडणाऱ्या कंत्राटदारावर पोलिसांनी गुन्हा दाखल केला आहे. सहकारनगर येथील गणेशदत्त सोसायटीमध्ये एका बंगल्याचे नूतनीकरण आणि रंगकामाचे काम सुरू होते.
काम करत असताना उंचावरून तोल गेल्यामुळे दोन मजूर खाली कोसळले. उंचावरून कोसळल्याने दीपक गुप्ता यांचा जागीच जीव गेला तर दीनानाथ चौधरी हे जखमी झाले आहेत.
या संपूर्ण घटनेबाबत मुन्ना जोखुप्रसाद गुप्ता यांनी पोलिसांत तक्रार दिली असून पोलिसांनी कंत्राटदार अफसर शेख आणि क्रांतीलाल यांच्यावर गुन्हा नोंदवला आहे.
पोलिस चौकशीत समोर आलेल्या माहितीनुसार, मजुरांना उंचावर काम करताना कोणत्याही प्रकारची सुरक्षा साधने देण्यात आली नव्हती. मजुरांच्या जीवाला धोका असू शकतो हे माहीत असूनही त्यांना सुरक्षिततेशिवाय कामावर लावल्याचा ठपका कंत्राटदारावर ठेवण्यात आला आहे. पोलिसांनी भारतीय न्याय संहितेच्या कलमांनुसार गुन्हा दाखल केला असून पुढील कारवाई सुरु केली आहे.
