पुणे: पुणे (Pune News) शहरात मकर संक्रांतीचा उत्साह आतापासूनच दिसून येत असून आकाशात पतंग उडू लागले आहेत. मात्र याच पतंगबाजीसाठी वापरला जाणारा घातक नायलॉन आणि चायनीज मांज्यावर बंदी घालण्यात आली आहे. हा मांजा रस्यावरून जाणाऱ्या दुचाकीस्वारांसाठी आणि निष्पाप पक्ष्यांसाठी मृत्यूचा फास ठरत असल्याने पोलिसांनी कारवाईचा बडगा उगारला आहे. आता केवळ मांजा विकणाऱ्यांवरच नाही, तर तो वापरणाऱ्यांवरही पोलिसांची करडी नजर असणार आहे. विशेष म्हणजे, जर एखादा लहान मुलगा नायलॉन मांजा वापरताना पकडला गेला, तर त्याचे पालक या गुन्ह्यासाठी जबाबदार धरले जातील आणि त्यांच्यावरही गुन्हा नोंदवला जाईल.
नायलॉन मांजाची धार इतकी असते की, त्यामुळे गळा कापला जाऊन मृत्यू होण्याच्या अनेक घटना पुण्यात घडल्या आहेत. अशा घटनांची गांभीर्य लक्षात घेऊन पोलिसांनी आता कारवाईचा इशारा दिला आहे. हा मांजा सहजासहजी तुटत नसल्याने पर्यावरणालाही मोठा धोका निर्माण होतो. शासनाने यावर बंदी घातली असली तरी शहराच्या काही भागात छुप्या मार्गाने विक्री सुरू असल्याचे पोलिसांच्या निदर्शनास आले आहे. त्यामुळे अशा छुप्या विक्रेत्यांचा शोध घेण्यासाठी पोलिसांनी विशेष मोहीम हाती घेतली आहे.
दरम्यान, आता नायलॉन मांजा वापरून पतंग उडवणे महागात पडू शकते. पोलिसांनी नागरिकांना विनंती केली आहे की, मनोरंजनासाठी कोणाचाही जीव धोक्यात घालू नका. या बेकायदेशीर मांजाची विक्री किंवा वापर होताना दिसला, तर त्यांनी पोलिसांना कळवावे. पालकांनी आपल्या मुलांकडे लक्ष द्यावे आणि त्यांना सुरक्षित साधा मांजा वापरण्यास सांगावे, असे आवाहन प्रशासनाकडून करण्यात आले आहे. नियमांचे उल्लंघन करणाऱ्यांना तुरुंगवास आणि मोठ्या दंडाला सामोरे जावे लागेल, असे स्पष्ट करण्यात आले आहे.
