Pune News : पुणे : पुणे जिल्ह्यातील जुन्नर तालुका ‘कांद्याचे आगर’ म्हणून ओळखला जातो. मात्र सध्या या भागातील कांदा उत्पादक शेतकरी मोठ्या आर्थिक अडचणीत सापडले आहेत. एकेकाळी चांगला नफा देणारा उन्हाळी कांदा यंदा तोट्याचा ठरत आहे. ओतूर कृषी उत्पन्न बाजार समितीत कांद्याला सध्या प्रतिकिलो फक्त 9 ते 12 रुपये इतकाच दर मिळत आहे. या दरात उत्पादन खर्चही निघत नसल्याने शेतकरी हताश झाले आहेत.
यंदा हवामान अनुकूल असल्याने कांद्याचे उत्पादन मोठ्या प्रमाणात झाले. पण बाजारात मोठी आवक झाल्यामुळे दर घसरले आहेत. ओतूर, रोहोकडी, आंबेगव्हाण, पाचघर, आहिनवेवाडी, उदापूर, डिंगोरे, उंब्रज, खामुंडी, डुंबरवाडी, धोलवड आणि नेतवड या गावांमध्ये मोठ्या प्रमाणात कांदा पिकवला जातो. या भागातील कांद्याला देशांतर्गत तसेच बेंगळुरु, गुजरात, कर्नाटक, दिल्ली आणि आखाती देशांमध्ये मागणी असते.
मात्र यंदा मध्यप्रदेश, राजस्थान आणि गुजरात या राज्यांतही कांद्याचे उत्पादन वाढले आहे. त्यामुळे स्पर्धा वाढली असून दरावर दबाव आला आहे. त्यातच निर्यातीसंदर्भातील धोरणे वारंवार बदलल्याने निर्यात जवळपास थांबली आहे. आंतरराष्ट्रीय परिस्थितीमुळे वाहतूक खर्च वाढला आहे. गॅस तुटवड्याचाही परिणाम दिसत आहे. त्यामुळे भारतीय कांदा परदेशात महाग पडत असून स्थानिक बाजारात साठा वाढत आहे.
दरम्यान, बियाणे, खते, औषधे आणि मजुरी यांचा खर्च मोठ्या प्रमाणात वाढला आहे. एका एकरासाठी सुमारे 80000 ते 1 लाख रुपये खर्च येत आहे. सध्याच्या दरात हा खर्च वसूल होणे कठीण झाले आहे. त्यामुळे शेतकरी अडचणीत आले असून शासनाने तातडीने उपाययोजना कराव्यात, अशी मागणी होत आहे.
