पुणे: पुण्यातून माणुसकीला काळीमा फासणारी एक (Pune News) धक्कादायक घटना समोर आली आहे. प्रेम प्रकरणाच्या रागातून एका 23 वर्षीय तरुणाची त्याच्या प्रेयसीच्या कुटुंबीयांनी निर्घृण हत्या केली. नागेश जाधव असे तरुणाचे नाव असून, या घटनेमुळे शहरात खळबळ उडाली आहे.
नागेश जाधव हा शिवाजीनगर भागात ‘ऑफिस बॉय’ म्हणून काम करून आपल्या कुटुंबाचा उदरनिर्वाह करत होता. 14 मार्चच्या सायंकाळी त्याला त्याच्या प्रेयसीच्या मोबाईलवरून एक मेसेज आला. हा मेसेज प्रेयसीनेच पाठवला असावा, या विश्वासाने नागेश तिला भेटण्यासाठी घराबाहेर पडला. मात्र, हा मेसेज म्हणजे त्याच्या हत्येचा रचलेला सापळा होता.
मिळालेल्या माहितीनुसार, प्रेयसीच्या कुटुंबीयांनी तिला हाताशी धरून किंवा तिचा फोन वापरून नागेशला एका निर्जन ठिकाणी बोलावून घेतले. तो तिथे पोहोचताच दबा धरून बसलेल्या 10 जणांनी त्याच्यावर हल्ला चढवला.
नागेशला बेदम मारहाण केल्यानंतर आरोपींनी त्याच्याच फोनवरून त्याच्या आईला कॉल केला. “आम्ही नागेशला मारलं आहे, त्याला घेऊन जा नाहीतर फेकून देऊ,” अशी निर्घृण धमकी त्यांनी दिली. घाबरलेल्या आईने घटनास्थळी धाव घेतली तेव्हा नागेश रक्ताच्या थारोळ्यात पडला होता. मरणासन्न अवस्थेत असताना नागेशने आईला सांगितले की, “तिच्याच नंबरवरून मेसेज आल्यामुळे मी तिथे गेलो होतो.” दुर्दैवाने, रुग्णालयात उपचार सुरू असताना त्याची प्राणज्योत मालवली.
