पुणे: पुणे (Pune News) शहरात वाहतूक कोंडी ही एक मोठी समस्या बनली आहे. शहरातील वाहतुकीचे योग्य नियोजन करण्याचे आव्हान प्रशासनासमोर आहे. विमाननगर परिसरात वाहतूक कोंडीच्या अनेक तक्रारी वाहतूक विभागाकडे येत होत्या. दरम्यान, तक्रारींची गंभीर दखल घेत, पुणे पोलीस आयुक्त अमितेश कुमार यांनी काल विमाननगर भागात वाहतुक कोंडीचा स्वतः आढावा घेतला. आज सकाळी त्यांनी स्वतः रस्त्यावर उतरून कोंडी सोडवण्यासाठी प्रयत्न केले.
विमाननगरमधील वाहतूक समस्या सोडवण्यासाठी वाहतूक विभागाने काही नवीन बदल केले आहेत. यानुसार, परिसरातील काही रस्त्यांवर एकेरी वाहतूक सुरू करण्याचा आदेश देण्यात आला आहे.
दरम्यान, दुसऱ्या प्रकरणात कर्तव्यावर असलेल्या वाहतूक पोलिसांनी एका चारचाकी वाहनचालकाला त्याच्या गाडीच्या काळ्या काचा आणि ड्रायव्हिंग लायसन्स बाबत विचारणा केली. यामुळे संतप्त झालेल्या चालकाने थेट पोलिसांशी उर्मटपणे वाद घालायला सुरुवात केली.
पोलिसांनी खाकी वर्दीचा धाक दाखवताच या तरुणाची मस्ती जिरली आणि त्याने हात जोडून माफी मागितली. या संपूर्ण प्रकरणाचा व्हिडिओ सोशल मीडियावर चांगलाच व्हायरल झाला आहे. दरम्यान, पुणेकरांनी नियमांचे पालन करत वाहतूक सुरळीत ठेवण्यास सहकार्य करावे, असे आवाहन प्रशासनाने केले आहे.
