पुणे: पुण्यातील गुलटेकडी परिसरात राहणाऱ्या खलील शेख या बांधकाम व्यावसायिकाने आपल्या राहत्या घरी गळफास घेऊन आत्महत्या केल्याची धक्कादायक घटना समोर आली आहे. या घटनेमुळे शहरात खळबळ उडाली असून, आत्महत्येपूर्वी त्यांनी बनवलेल्या व्हिडिओने संपूर्ण प्रकरणाला वेगळे वळण दिले आहे. खलील शेख यांनी आपल्या मृत्यूला काही व्यक्ती जबाबदार असल्याचे सांगत, त्यांची नावे या व्हिडिओमध्ये उघड केली आहेत.
मिळालेल्या माहितीनुसार, रविवार पेठेतील वक्फ बोर्डाच्या जमिनीवर ‘उत्कर्ष असोसिएट्स’च्या माध्यमातून एक गृहनिर्माण प्रकल्प सुरू होता. या प्रकल्पात खलील शेख हे देखील भागीदार होते. मात्र, विविध तांत्रिक आणि कायदेशीर अडचणींमुळे हा प्रकल्प बराच काळ रखडला. व्हिडिओमध्ये खलील शेख यांनी असा दावा केला आहे की, या आर्थिक व्यवहारात त्यांची मोठी फसवणूक झाली असून, त्यांचे ५० लाख रुपये थकलेले होते. आर्थिक ओढगस्त आणि कर्जाच्या वाढत्या दबावामुळे आपण हे टोकाचे पाऊल उचलत असल्याचे त्यांनी नमूद केले आहे.
या गंभीर आरोपांनंतर स्वारगेट पोलीस ठाण्यात माजी आमदार रवींद्र धंगेकर, त्यांच्या पत्नी प्रतिभा धंगेकर यांच्यासह एकूण १० जणांविरुद्ध गुन्हा दाखल करण्यात आला आहे.
दुसरीकडे, माजी आमदार रवींद्र धंगेकर यांनी या सर्व आरोपांचे खंडन केले आहे. त्यांच्या मते, त्यांच्या पत्नीने २०२५ मध्येच या भागीदारीतून अधिकृतपणे बाहेर पडण्याचा निर्णय घेतला होता. या प्रकल्पाचे नुकसान राजकीय हस्तक्षेपामुळे झाल्याचा दावा त्यांनी केला आहे. सध्या पोलीस या संपूर्ण प्रकरणाचा सखोल तपास करत असून, व्हिडिओमधील पुरावे आणि आर्थिक व्यवहारांची पडताळणी केली जात आहे.
