विशाल शिंदे
भोर: वीरवाडी (Bhor Accident) गावाच्या हद्दीत गुरुवारी सकाळी झालेल्या भीषण अपघातात एक 71 वर्षीय वृद्धाचा मृत्यू झाला असून अॅम्बुलन्स चालक किरकोळ जखमी झाला आहे. धडक दिल्यानंतर डंपर चालक वाहनासह पसार झाल्याने परिसरात संताप व्यक्त होत असून पोलिसांनी सखोल तपास सुरू केला आहे.
फिर्यादी संदीप हरीभाऊ शिंगाडे हे दिनांक 20 नोव्हेंबर रोजी सकाळी सुमारे 10 वाजता करंजवणे येथून पुण्याकडे जात असताना जांभळी गावातील पंढरीनाथ तिखोळे (वय 71) हे नसरापूर येथे जाण्यासाठी अॅम्बुलन्समध्ये बसले. अॅम्बुलन्स वीरवाडी वळणावर पोहोचताच अचानक नसरापुरच्या दिशेने भरधाव वेगाने येणाऱ्या डंपरने अॅम्बुलन्सला तीव्र धडक दिली.
अपघात इतका गंभीर होता की, पंढरीनाथ तिखोळे यांचा या अपघातात मृत्यु झाला आहे. तर फिर्यादी चालक शिंगाडे यांना किरकोळ दुखापत झाली असून अॅम्बुलन्सचे मोठे नुकसान झाले आहे. अपघातानंतर डंपर चालक पसार झाल्याने तो कोण होता? डंपर ओव्हरलोड होता का? याबद्दल विचारणा केली जात आहे.
दरम्यान, या मार्गावर अवजड वाहनांची गर्दी वाढल्यामुळे अपघाताचे प्रमाण अलीकडे वाढू लागल्याचे स्थानिक नागरिकांनी सांगितले. विशेषतः रविवारी नसरापूरचा साप्ताहिक बाजार असल्याने या दिवशी अवजड वाहनांना वाहतुकीसाठी बंदी घालावी, अशी मागणीही जोर धरू लागली आहे. या भागातून अवैध किंवा ओव्हरलोड वाहतूक सुरू होती का? याकडेही लक्ष देणे आवश्यक असल्याचे नागरिकांचे म्हणणे आहे.
अपघाताची माहिती मिळताच राजगड पोलिसांनी घटनास्थळी जाऊन पंचनामा केला असून डंपर व चालकाचा शोध घेण्यासाठी विविध ठिकाणचे सीसीटीव्ही फुटेज तपासले जात आहेत. प्राथमिक तपास पोहवा अडवाल यांनी केला असून पुढील तपास पोहवा गायकवाड यांच्या मार्गदर्शनाखाली सुरू आहे.
