पुणे: पुण्यातील (Pune News) वाहतूक व्यवस्था सुधारण्यासाठी एक महत्वाकांक्षी प्रकल्प सध्या वेग घेत आहे. खडकवासला धरणाच्या पाणलोट क्षेत्रात तब्बल 8-पदरी पूल (Flyover) उभारला जात आहे, जो सांगरूण आणि मालखेड या गावांना थेट जोडणार आहे. या पुलासाठी एकूण 276 खड्डे तयार करण्यात येत आहेत, ज्यापैकी 120 खड्डे पाण्यात, तर 156 खड्डे जमिनीवर खणले जाणार आहे. सध्या पाण्यातील 59 खड्ड्यांचे काम पूर्ण झाल्याची माहिती मिळाली आहे. प्रत्येक दोन खांबांमध्ये 40 ते 60 मीटर अंतर ठेवले जात असून, यामुळे पुलाची स्थिरता आणि मजबुती अधिक वाढणार आहे.
खडकवासला धरणाच्या पाणलोट क्षेत्रात बांधला जाणारा हा पूल 350 मीटर लांबीचा असून, रिंग रोडच्या (Ring Road) योजनेत याला अत्यंत महत्वाचं स्थान आहे. पाइल फाउंडेशन या अत्याधुनिक तंत्रज्ञानाचा वापर करून पूल बांधणीचं काम सुरू आहे.
कामाचा वेग आणि प्रगती:
पुलाच्या कामाला एप्रिल 2025 मध्ये सुरुवात झाली असून, नवयुगा कंपनीकडून बांधकाम जलद गतीने सुरू आहे. पूल उभारणी स्टील, काँक्रिट आणि लाकडापासून केली जाणार आहे. पुणे जिल्ह्यातील कोणत्याही धरणाच्या पाणलोट क्षेत्रात बांधला जाणारा हा पहिला मोठा पूल ठरणार आहे. यामुळे पुणे जिल्ह्याच्या विकासाच्या नकाशावर हा पूल एक नवा टप्पा ठरणार आहे, असं प्रशासनाचं मत आहे. हा पूल पूर्ण झाल्यानंतर, खडकवासला धरणाच्या पाणलोट क्षेत्राचं विहंगम (Panoramic) दृश्य प्रवाशांना अनुभवता येणार आहे.
