Pune Accident : पुणे : पुणे–सोलापूर राष्ट्रीय महामार्गावर इंदापूर तालुक्यातील लोणी देवकर परिसरात क्रुझर जीप आणि ट्रक यांच्यात भीषण अपघात झाला. या अपघातात क्रुझरमधील तिघांचा जागीच मृत्यू झाला आहे. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, संबंधित तिघे जण क्रुझर गाडीतून प्रवास करत होते. प्रवासादरम्यान अचानक गाडीचा टायर फुटला. त्यामुळे चालकाचे नियंत्रण सुटून गाडी रस्ता दुभाजक ओलांडून समोरून येणाऱ्या ट्रकला धडकली. ही धडक इतकी जोरात होती की क्रुझरमधील तिघांचाही जागीच मृत्यू झाला.
मृतांमध्ये वाहन चालक प्रमोद बाळासो खवळे (वय 28, रा. मदनवाडी, ता. इंदापूर), शशांक कोटिया (वय 32, रा. गौतमनगर, गिरड, ग्वालियर, मध्य प्रदेश) आणि विजयसिंह राजपूत (वय 35, रा. त्रिलोकनगर, मध्य प्रदेश) यांचा समावेश आहे. हे तिघेही लोणी देवकर एमआयडीसी परिसरातील एका खासगी कंपनीत काम करत असल्याची माहिती समोर आली आहे.
अपघाताची माहिती मिळताच महामार्ग पोलीस तातडीने घटनास्थळी दाखल झाले. त्यांनी मदतकार्य सुरू करून वाहतूक सुरळीत केली. या अपघातामुळे काही काळ वाहतूक विस्कळीत झाली होती.
