पुणे: पुण्यातील फुरसुंगी (Phursungi) परिसरातून एक संतापजनक घटना समोर आली आहे. एका 22 वर्षांच्या तरुणाने चोरीचा खोटा आळ आणि सार्वजनिक ठिकाणी झालेला अपमान सहन न झाल्याने आत्महत्या केली आहे. अतुल लक्ष्मण अहिरे (रा. पापडे वस्ती, फुरसुंगी) असे तरुणाचे नाव आहे. प्रामाणिकपणावर प्रश्नचिन्ह उपस्थित केल्यावर तरुणाला सहन झालं नसल्याने त्याने टोकाचा निर्णय घेतला.
सोबत काम करणाऱ्या दोन सहकाऱ्यांनी अतुलवर चोरीचा आरोप केला होता. तसेच आरोपींनी त्याला सर्वांसमोर अर्वाच्य भाषेत शिवीगाळ केली आणि मारहाणही केली. हा अपमान त्याला सहन झाला नाही.
अतुलने मध्यरात्री पुणे-कोल्हापूर लोहमार्गावर धावत्या रेल्वेखाली स्वतःला झोकून दिले. ज्यात त्याचा मृत्यू झाला आहे. अतुलच्या भावाने दिलेल्या फिर्यादीनंतर फुरसुंगी पोलिसांनी संबंधित दोन आरोपींविरुद्ध ‘आत्महत्येस प्रवृत्त’ केल्याचा गुन्हा दाखल केला आहे. सहाय्यक पोलीस निरीक्षक नानासाहेब जाधव या प्रकरणी अधिक तपास करत आहेत.
