पुणे: पुण्यातील नाना पेठ भागात (Pune News) राष्ट्रवादीचे माजी नगरसेवक वनराज आंदेकर यांची निर्घृणपणे हत्या करण्यात आली होती, या प्रकरणी मोठी अपडेट समोर आली होती. गुन्हे शाखेने न्यायालयात सादर केलेल्या तब्बल 1700 पानांच्या दोषारोपपत्रातून धक्कादायक माहिती समोर आली आहे.
खून का झाला? तीन प्रमुख कारणे:
कौटुंबिक संपत्तीचा वाद: वनराज आंदेकर आणि त्यांची बहीण संजीवनी कोमकर तसेच जावई यांच्यात मालमत्तेवरून जुना वाद होता. हे घरगुती भांडण टोकाला गेले होते.
अतिक्रमण कारवाईचा सूड: खुनाच्या काही दिवस आधी पुणे महापालिकेने संजीवनी कोमकर यांच्या दुकानावर हातोडा चालवला होता. आपल्या भावाच्या सांगण्यावरूनच ही कारवाई झाल्याचा पक्का संशय कोमकर कुटुंबाला होता, ज्यामुळे संतापाची आग अधिक भडकली.
टोळीयुद्धाचा जुना हिशोब: निखील आखाडे याच्या खुनाचा बदला सोमनाथ गायकवाडला घ्यायचा होता. निखील आखाडेचा खून आंदेकर टोळीने केला असा आरोप होता. दरम्यान, याप्रकरणी अनेकांना अटक करण्यात आले होते. परंतु आंदेकर टोळीतील आरोपींना जामीन मिळण्यामागे वनराज यांचे राजकीय ओळखी कारणीभूत असल्यामुळे गायकवाडला राग होता.
वनराज आंदेकरांचा काटा काढण्यासाठी कोमकर आणि सोमनाथ गायकवाड या दोन टोळ्यांनी अनपेक्षितपणे हातमिळवणी केली होती. 1 सप्टेंबर 2024 च्या रात्री कटानुसार नाना पेठेतील वीजपुरवठा मुद्दाम खंडित करण्यात आला. काळोखाचा फायदा घेत आरोपींनी वनराज यांच्यावर गोळ्या झाडल्या आणि त्यानंतर कोयत्याने वार केले. याप्रकरणी 21 जणांवर गुन्हा दाखल करण्यात आला होता. समोर आलेल्या माहितीनुसार, 1700 पानांच्या दोषारोपपत्रात 39 प्रत्यक्षदर्शींचे जबाब आणि सीसीटीव्ही फुटेजचा समावेश आहे, जे आरोपींना कठोर शिक्षा होण्यासाठी महत्त्वाचे ठरणार आहेत.
