पुणे : लोणीकंद परिसरातून (Lonikand News) माणुसकीला काळिमा फासणारी एक अत्यंत धक्कादायक घटना समोर आली आहे. एका १९ वर्षाच्या तरुणाने ११ वर्षाच्या अल्पवयीन मुलाला फूस लावून त्याच्यावर (Pune News) अनैसर्गिक लैंगिक अत्याचार केल्याचा प्रकार उघडकीस आला आहे. या प्रकरणी लोणीकंद पोलिसांनी तातडीने पावले उचलत आरोपीला बेड्या ठोकल्या आहेत. (Pune Crime)
मिळालेल्या माहितीनुसार, छोटू बद्रिप्रसाद प्रजापती असे अटक करण्यात आलेल्या आरोपीचे नाव असून तो लोणीकंद येथील सावतामाळीनगर, झुरुंगे वस्ती परिसरात राहतो. ही घटना २२ डिसेंबर रोजी दुपारी २:३० वाजताच्या सुमारास घडली. आरोपी छोटू याने फिर्यादी यांच्या ११ वर्षाच्या मुलाला गाठले आणि आपण दोघे झाडीमध्ये खेळ खेळूया, असे खोटे सांगून मुलाचा विश्वास संपादन केला. त्यानंतर तो या मुलाला निर्जन ठिकाणी असलेल्या झाडीत घेऊन गेला. तिथे त्याने या अल्पवयीन मुलावर जबरदस्तीने अनैसर्गिक लैंगिक अत्याचार केला.
या धक्कादायक प्रसंगानंतर घाबरलेल्या मुलाने घरी जाऊन आपल्या पालकांना घडलेल्या सर्व प्रकाराची माहिती दिली. आपल्या मुलासोबत झालेला हा क्रूर प्रकार ऐकून पालकांना मोठा धक्का बसला. त्यांनी विलंब न लावता लोणीकंद पोलीस स्टेशन गाठले आणि आरोपीविरुद्ध रीतसर फिर्याद दिली. पालकांच्या तक्रारीवरून पोलिसांनी गुन्हा दाखल केला असून आरोपी छोटू प्रजापती याला अटक करण्यात आली आहे.
या प्रकरणी पोलिसांनी बाल लैंगिक अत्याचार प्रतिबंधक कायद्यासह (पॉक्सो) इतर विविध कलमान्वये गुन्हा नोंदवला आहे. सध्या सहायक पोलीस निरीक्षक वंजारी या प्रकरणाचा पुढील तपास करत आहेत. परिसरात अशी घटना घडल्यामुळे स्थानिक नागरिकांमध्ये भीती आणि संतापाचे वातावरण निर्माण झाले आहे. मुलांच्या सुरक्षिततेचा प्रश्न पुन्हा एकदा ऐरणीवर आला असून पालकांनी आपल्या मुलांकडे विशेष लक्ष देण्याची गरज निर्माण झाली आहे.
