लोणी काळभोर, ता. 18: घरी कोणी नसल्याची संधी (Loni Kalbhor) साधून चोरट्यांनी भरदिवसा फ्लॅट फोडून रोख रकमेसह सुमारे 2 लाख रुपयांच्या सोन्या चांदीच्या दागिन्यांवर डल्ला मारल्याची घटना घडली आहे. ही घटना कदमवाकवस्ती येथील कवडीपाट टोलनाकाजवळ असलेल्या श्री आरंभ अपार्टमेंटमध्ये घडली आहे. भरदिवसा झालेल्या या धाडसी घरफोडीमुळे परिसरात खळबळ उडाली आहे.
याप्रकरणी अॅम्बुलन्स चालक अमर विठ्ठल खरात यांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात चोरट्याच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, अमर खरात हे कामानिमित्त बाहेर गेले असताना त्यांच्या पत्नी शिक्षणासाठी कॉलेजमध्ये गेल्या होत्या. याच संधीचा फायदा घेत चोरट्यांनी तिसऱ्या मजल्यावरील फ्लॅट क्रमांक 302 चे कुलूप तोडून घरात प्रवेश केला. बेडरूममधील कपाट उचकटून लॉकरमधील सोन्याचे मिनी गंठन, अंगठ्या, मंगळसूत्र, कानातले, लहान मुलाचे दागिने, चांदीचे साहित्य तसेच पिशवीतील 1 लाख रुपये रोख असा मौल्यवान ऐवज चोरून नेला.
अमर खरात हे कामावरून परत आल्यानंतर त्यांना घराचे कुलूप तुटलेले दिसले. त्यांनी घरात जाऊन तपासणी केली असता, घरात चोरी झाल्याचे लक्षात आले. याप्रकरणी खरात यांनी तात्काळ लोणी काळभोर पोलीस ठाण्यात तक्रार दिली. त्यानुसार अज्ञात चोरट्याविरोधात गुन्हा दाखल करण्यात आला असून पोलिसांकडून परिसरातील सीसीटीव्ही फुटेज तपासले जात आहे.
दरम्यान, भरदिवसा घडलेल्या या धाडसी चोरीमुळे नागरिकांमध्ये भीतीचे वातावरण पसरले असून, वाढत्या घरफोडीच्या घटनांवर आळा घालण्यासाठी पोलिसांनी गस्त वाढवावी, अशी मागणी स्थानिकांकडून होत आहे.
